Hajiji miampai naalap suai minonuntung gandang montok pinopoimagon Karnival Spoot “Lions Tuaran Merdeka Run & Cycling 2023” id Padang Kakadayan Tuaran, Tuaran, di tadau baino’.
TUARAN: Boyoon Montiri, Datuk Seri Hajiji Haji Noor minagangat rayat mogisuai tinaru id pogun diti tumilombus monginggirot po do piromutan piuludan om pisompuruan di haro mantad.
Ka disio, id kinaramaion mamaramit Tadau Kinomordikaan, pisompuruan om pihunungan id nayatan rayat mogisuai tinaru om kotumbayaan ugama’ kiguno tilombuson mongingkawas.
Minoboros isio, iti oponsol montok papatantu’ Sabah kotilombus kopuriman komogoton om koburuon nogi’ kasasanangan rayat kotilombus ogompi’.
Hajiji miampai naalap suai pinapangkis “Merdeka” id Karnival Spoot “Lions Tuaran Merdeka Run & Cycling 2023” id Padang Kakadayan Tuaran, Tuaran, di tadau baino’.
“Rayat kiguno mamagatang kinomordikaan i naanu do pomogunon om pogun Sabah. Ilo’ pogi’ do toun diti suai ko’ mamaramai Tadau Kabansaan, mamaramai tokou nogi’ do Tadau Sabah i kopokito tadau kinomordikaan pogun diti mantad kokuasa’an British i ramaion montok kumoinsan nogi’ do ko 31tw Kowalu’ diti,” ka disio ontok pinopoimagon Karnival Spoot “Lions Tuaran Merdeka Run & Cycling 2023” id Padang Kakadayan Tuaran di tadau baino’.
Hajiji minoboros, sunduan pisompuru, mogiambalut om mogipapantang kanau mongimbulai koyuon di oulud, ounsikou om osompuru.
Hajiji pinopotunui tutungkap kuminaa dilo’ nakalantoi ababayan tumangkus kopihondot Karnival Spoot “Lions Tuaran Merdeka Run & Cycling 2023” id Padang Kakadayan Tuaran, Tuaran, di tadau baino’.
Kalansanan disio karnival spoot i pinaanjur do Lions Club Tuaran okon nopo ko’ koposuni nubasanan spoot nga nogi’ koposindak sunduan ‘patriotik’ om kinomordikaan id nayatan rayat.
Nokotindapou nogi’ i Montiri Koburuon Labus Kakadayan om Puru Lintuhun Koundangan Pogun (ADUN) Tamparuli, Datuk Jahid Jahim, ADUN Pantai Dalit, Datuk Jasnih Daya om Presiden Lions Club Tuaran, Kapitan Frankie Goh.
