Hajiji Haji Noor
KOTA KINABALU: Koporintaan Pogun minonuridong iso’ puruankuasa’ pinotomod Kabinet montok monoibau hal Rontob Kosukupan Tinan (SSL – Tahap Sara Diri).
Boyoon Montiri (KM), Datuk Seri Hajiji Haji Noor minoboros, puruankuasa’ pinotomod dilo’ buruanon do Komontirian Pomutanaman, Ponginsadaan om Pomorunan Takanon pogun (MAFFI).
“Oondos oku di inggisaman opinogot MAFFI om kotinanan ngaawi’ id siriba’ dau nogi’ tongo’ kotinanan Koporintaan Pisompuruan i pinopiuhup ginoris miniiso’ pinapalantoi tuduan mongingkawas SSL kopolobusan koinsanai ponit kogogonopan takanon id pogun diti.
“Wookon hal di nointutunan, kopohompit do ginayo koiyonon ranahon i nokoingkuri’ mantad no do ginuno suminili koiyonon kopoburuan pomuwalaian om kadai komersial. Montok monoibau hal diti, Koporintaan minongukab koiyonon pananaman parai wagu id Trusan Sapi, Beluran kiginayo kikiro 2,000 ekar.
“Poburuon ilo’ miampai piuhupan do MAFFI om kotinanan dau ilo’ nopo nga’ Korporasi Kopoburuan Desa (KPD), Koupisan Pomutanaman, Koupisan Pomuwoigan om Poluyungan miampai kogompitan siktor swasta nogi’ mogigiyon Trusan Sapi sabaagi tutumanud pananaman parai,” ka disio ontok pinopoimagon Tadau Momukabun, Momutayam om Monginsada’ nayatan pogun Sabah 2023 id Wisma Pertanian do hiti di tadau baino. Teks boboroson disio binasa’ di Kumoduo Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
Boyoon Montiri minoboros, koinsanai inggisaman i nanu Koporintaan diti montok mamajamin pangaba’ takanon di korungod om kopongimbulai lobi kogumu’ asil pomutanaman kigatang akawas montok tuduan komersial i kaanu mongunsub kosunion siktor dilo’.
“Siktor pomutanaman, ponginsadaan om pomutayaman kiharo kosiwatan di agayo kopio montok tilombuson poburu’ id pogun diti.
“Koposotolan nopo nga’ kumaa tongo’ ababayan piromutan gatang miampai poinpuli ilo’ nop onga’ kopoingkawasan kopolobusan, ponimungan asil, kopomurisisan om pidagangan di lobi koulud nogi’ pomogunaan tiknologi kaawagu montok mamajamin pangaba’ takanon di korungod om kopoinggayaan kopoudaran kumaa labus pogun,” ka disio.
Kohondot dilo’ minoboros isio, montok subsiktor tanom, soginumu’ RM115.39 riong pinoobi’ kumaa Koupisan Pomutanaman monotk mongingkawas kopolobusan mogisusuai asil tanom, montok manahak nindopuan tinimungan momumutanom mantad RM2,000 kumaa RM4,000 sombulan.
“Inggisaman Koporintaan montok monguhup tinimungan buntukon B40 om mosikin ‘tegar’ maan tilombuso’ maya’ Korporasi Kopoburuan Desa miampai poruntukan soginumu’ RM20.28 riong. Soginumu’ 2,015 tuutmanud karamit koundaran mantad kopoindalanan mogisusuai ababayan tayam om tanom.
“Suai mantad dilo’, KPD Smart System noturidong no om gunoon doid longkod ngaawi’ ponimungan asil tanom KPD.
“Id subsiktor ponginsadaan nopo, Koporintaan Pogun maya’ Koupisan Ponginsadaan, Ko-Nelayan om SAFMA o wookon dilo’, tumilombus popoindalan inggisaman montok mamajamin intodonon pangaba’ ponginsadaan di kogonop id pogun diti.
“Wookon dilo’, mongunsub monginginsada’ omulok popoburu’ pomogompian sada’ suang kukurungan, ‘pengkulturan rumpai laut’, kaampai no mongukab pomorunan ‘hiliran’ kopomurisisan asil ponginsadaan miampai papalabus asil miagal do Keropok Amplang,” ka disio.
Minoboros isio, soginumu’ RM46.09 riong pinoobi’ kumaa Koupisan Ponginsadaan, do toun diti, montok monilombus mogisusuai ababayan jominan kopolobusan asil ponginsadaan po’ompus montok manampung pidagangan id pogun om sompomogunan.
“Naamot montok siktor tayam, Sabah kakal mongudar daging lembu, daging kambing, asil tenusu, asil manuk om tontolu. Poingkuro po, inggisaman aparagat masaan poindalanon do Koupisan Surupukaraja’ Veterinar Sabah maya’ Projik Papagaras Pomorunan Ruminan Sabah i kigatang RM50 riong.
“Koupisan diti nga’ popiromut nogi’ pisokodungan miampai pipiro GLC maya’ projik miagal Projek Integrasi Ternakan id Sahau Piasau Sawit (PINTAR), Projik Tayam Kambing om Ababayan Transformasi Tayam,” ka disio.
