Puru bomba pinopoudong taangob doros jambatan di notuhan.
RANAU: Iso’ jambatan konkrit id Kampung Mohimboyon do hiti notuhan gisom amu’ awaya’an gama-gama’ noluyungan waig osolog nosusuhut rasam asapou minonigowo di sodopon konihab.
Luguan Balai Bomba om Monumpasi (BBP) Ranau, Ridwan Mohd Taib minoboros, kinaantakan naantakan di jam ko 5 sodopon. Kampung dilo’ poinsumpak kikiro 13 kilometer mantad BBP.
Minoboros isio, puru bomba nokorikot id kinoiyonon kinaantakan montok miniontong koyuyuon om pinapalatan taantob montok papatantu’ koumoligan papamanau om tulun ginumuan.
“Nakaramit yahai pamalahawan mantad tulun ginumuan i pinoporuput kinaantakan kapaampai jambatan ralan agayo mogigiyon id Kampung Mohimboyon i notuhan gama-gama’ waig baang di osolog.
“Boogian bomba minomorisa’ om minintong kinoiyonon kinaantakan. Katalib pinopoindalan pomorisaan koumoligan id kinoiyonon, taantob pinoudong montok monompon wawayaan jambatan mooi do mogigiyon kampung amu’ maya’ dilo’,” ka disio.
Bohogian kikuasa’ miniontong koyuon id pososorili’ jambatan notuhan dilo’.
I Ridwan pinoposorou mogigiyon kampung om papamanau padsakaian suai mooi do amu’ maya’ kinoiyonon dilo’ om momoguno waya’an di suai.
Naamot dilo’, Koupisan Karaja’ Agayo (JKR) Ranau soira’ rinomut pinopoilo ralan dilo’ okon ko’ id sahau kaganaan kuasa’ JKR nokoiyonon.
Upisor JKR Ranau di wagu, Alvonna Farhanah minoboros, ralan dilo’ okon ko’ id sahau panamangan JKR, nga’ upis disio monguhup manahak komi toi ponontudukan teknikal nung pokionuon.
Gama-gama’ kinaantakan dilo’, hinotusan tulun amu’ koponilombus kapaapanaho’ tadau-adau diolo’ om susumikul nogi’ mongingia’ Sikul Kabansaan (SK) Mohimboyon id doros nga’ asansagan monimpuun sesi kosikulan wagu diolo’ maya’ pinsingilaan mantad walai (PdPR).
