Boyoon Montiri, Datuk Seri Hajiji Haji Noor suminasi’ Istiadat Lafaz Sumpah Karaja’ Molohingon Pogun Sabah Ko-10, Tun Juhar Mahiruddin id Istana Seri Kinabalu, Kota Kinabalu, di konihab.
KOTA KINABALU: Rayat id pogun diti pinokianu tumilombus mogiuhup, misokodung om misompuru ogirot papasarok kopotundaan pogun diti.
Boyoon Montiri, Datuk Seri Hajiji Haji Noor, otumbayaan pogun diti kotilombus karamit kotoronongon, kalantaion om koburuon nung oinsanan rayat misompuru ogirot.
“Pogun Sabah do noondo diti id waya’an di kohunung montok papagaras kosunion ikonomi om papasarok kopotundaan maya’ Palan Koburuon Hontolon Sabah Maju Jaya (SMJ) 1.0, 2021-2025.
“Kopoindalanan palan kopotundaan di agayo om po’ompus diti nokopokito waya’ osonong. Wookon dilo’, kaampai no gatang kopoopuan labus om saalom di nokoinggumu’, kinoburuon osonong siktor ponombuluyan nogi’ kinopoindalanan mogisusuai ababayan kopotundaan id koinsanai siktor.
“Maya’ koponguludan kousinan pogun di osonong nopo, asil pogun nokotilombus nokoinsawat o nokosigampot numbur RM6.6 bilion di toun 2022,” ka disio.
Boyoon Montiri, Datuk Seri Hajiji Haji Noor ontok minoboros id Istiadat Lafaz Sumpah Karaja’ Molohingon Pogun Sabah Ko-10, Tun Juhar Mahiruddin id Istana Seri Kinabalu, Kota Kinabalu di konihab.
Minoboros isio dilo’ id Istiadat Lafaz Sumpah Karaja’ Molohingon Pogun Sabah Ko-10, Tun Juhar Mahiruddin montok penggal kuma’apat id Istana Seri Kinabalu do hiti, di konihab.
Minoboros i Hajijji, sundung Hontolon SMJ moningkanan di tolu impohon osuul, nga’ siktor ngaawi’ suai onuan nogi’ do kopomodulianan.
Okito iti ka disio maya’ Bajet Pogun Ton 2023 i kiginumu’ RM5.138 bilion, hinombo do somok oinsanan komontirian om koupisan nakaanu kinoingkawason kopoobian kousinan.
Iti kopuli do oinsanan siktor, mantad siktor ikonomi, sosial, pomorunan, poutanaman, ponombuluyan, kogogonopan, modal insan gisom no kumaa kopotundaan koonduan, komulakan om sipoot.
