Tun Juhar pinolombus taru karaja’ TYT montok penggal kumoinggapat.
KOTA KINABALU: Molohingon Pogun Sabah, Tun Juhar Mahiruddin di konihab tuminaru karaja’ disio montok penggal kumoinggapat.
Isio do talib dilo’ suminain ‘Surat Cara Angkat Sumpah Jawatan’ id toguang di Hakim Agayo Sabah om Sarawak, Tan Sri Abang Iskandar Abang Hashim.
Istiadat i nakapanau doid Lintuhun Istiadat, Istana Seri Kinabalu dilo’ notindapou di Boyoon Montiri, Datuk Seri Hajiji Haji Noor i pinopolombus po nogi’ do panangkabayahan om tuminaru’ tumiu’.
Nokotindapou nogi’ i Kumoduo Boyoon Montiri, Datuk Seri Dr. Joachim Gunsalam, Speaker Lintuhun Koundangan Pogun (DUN) Sabah, Datuk Seri Kadzim M. Yahya, Montiri-montiri Kabinet pogun, Monunurat Koporintaan Pogun, Datuk Seri Safar Untong nogi’ tongo’ luguan koupisan.
Tun Juhar (wanan) tuminabi’ di Abang Iskandar (gibang) katalib Ababayan Suminain Surat Cara Angkat Sumpah Jawatan TYT nopongo.
Di ko 23tw Kohopod om Duo katatalib, Tun Juhar nakaramit Surat Cara Perlantikan monotk mongoput timpu surupukaraja’ disio solinaid duo toun mantad di Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah id Istana Negara, Kuala Lumpur.
Tun Juhar, 69, i sinili sabaagi Molohingon Pogun (Tuan Yang Terutama – TYT) Sabah pointonod ko 1tw Koiso’ 2011, nopo nga’ TYT kumoiso’ i nonuan tonggungan dilo’ lobi 10 toun pointonod ponimbanan Rang Undang-Undang Koundangan Pogun Sabah montok mongidu’ rontob timpu duo penggal surupukaraja’ TYT pinolulus do DUN Sabah di toun 2018.
