Dr. Joachim miampai momuruan PBS pinopokito kosokodungand iolo’ id mitingan.
KOTA KINABALU: Parti Bersatu Sabah (PBS) minamatos manahak sokodung poinponu’ om pinopouyu dau do momuruan pakakaraja’ pomilian agayo montok limo mongingigit Puru Lintuhun Undangan Pogun (ADUN) Parti Solidariti Tanah Airku (STAR) i minomili’ do tuminimporon miampai Gabungan Rakyat Sabah (GRS).
Luguan Kopointalangan PBS, Datuk Joniston Bangkuai minoboros, kootusan dilo’ nosigampot id mitingan Biro Pulitik PBS i pinonorikohon di Ponowoli Presiden, Datuk Seri Dr. Joachim Gunsalam, di tadau baino’.
Minoboros isio, Ponowoli Presiden minonuhu’ bohogian PBS id limo watas dilo’ – Sook, Bingkor, Paginatan, Liawan om Tulid – do monimpuun pibabarasan miampai ADUN mongingigit yolo’ i Datuk Ellron Angin, Datuk Robert Tawik, Datuk Abidin Madingkir, Datun Annuar Ayub om Datuk Flovia Ng i tuminimporon miampai GRS soira’ STAR minaganu katatapan do tumanding mimpoopori id pomilian agayo diti baino’.
“Limo koiyonon diti nopo nga’ wookon koiyonon i kiharo kinorikatan gamut PBS di ogirot om aparagat.
“Parti otumbayaan do miampai popiamung intodonon om miuhup, GRS kaanu monilombus waya’ dau nogi’ kotilombus kaanu kotumbayaan mongungundi’ id pomilian agayo pogun do obontol,” ka di Joniston, p onogi’ Luguan Kopointalangan GRS.
“PBS alaid no nokopiromut piuhupan osonong miampai diolo’ id nayatan guas, om tilombuson dahai piilangan diti id sunduan otopot pisompuruan GRS,” ka disio kawagu.
Pinointalang nogi’ disio do sokodung PBS nounsub di korotian do piuhupan om kotumbayaan pialatan parti komponen GRS oponsol kopio montok monilombus kaadangon pulitik nogi’ papatantu’ koburuon aanu poporikot kumaa rayat.
“Kootusan diti winonsoi mimpau sunduan tonggungan oinsanan montok momogompi’ kotumbayaan om kotungkayanan rayat kumaa GRS, nogi’ monilombus inggisaman i notimpuunan tokou id siriba’ piomungan diti montok koundaran mogigiyon tokou,” ka disio.
