Wilfred Madius Tangau
TUARAN: Puru Parlimen Tuaran, Datuk Seri Wilfred Madius Tangau pinopolombus sokodung kohondot atag monimbang kopoindalanan undi pos montok mogigiyon Sabah i poingkaraja’, poinsikul om mongingiyon id Semenanjung Malaysia.
Ka di Madius, pongunsuban diti okon i ko’ kumoinsan nogi’ nga’ inggumu’ no poboroso’ do mogisusuai bohogian kaampai Tinan Okon Koporintaan (NGO) miagal do Bersih.
“Montok doho’ laang diti apatut poindalanon montok papatantu’ rayat Sabah i haro id labus pogun nantadon amu’ ohimpogongan mantad popoindalan tonggungan om kopotutan demokrasi.
“Ogumu’ mogigiyon Sabah id Semenanjung kotoguang kosusaon montok muli’ kumaa kampung ontok pomilian agayo tu’ kosusaon kaanu pontuludan, tambang pontuludand i akawas, suai ko’ kosusaon kaanu suti’ om kohimpogongan timpu.
“Atag undi pos diti kouhup diolo’ popoindalan tonggungan kumaa pomogunon miampai amu’ mananggung pabalanjaan di agayo,” ka disio id kointalangan di tadau baino’.
Isio po nogi’ Presiden Kehormat Kotinanan Kinabalu Progresif Misompuru (UPKO) minoboros, inggisaman popoinggayo piromutan kumaa undi pos nopo nga’ laang kumaa kopoinggirotan nubasanan demokrasi om kogompitan rayat id kopoindalanan pomilian agayo.
“Nuru’ tokou papatantu’ kopotutan mongundi aramit do oinsanan mamasok miampai amu’ monimud kinoiyonon diolo’.
“Sistem undi pos di otulid om oumolig kapasaga’ lobi kogumu’ rayat Sabah maganu bohogian id proses demokrasi,” ka disio.
Ka di Madius, atag dilo’ kopiongoi di prinsip kaadangon om kapatanggayan ngaawi’ i nosili impohon kumaa sistem pomilian agayo id pomogunon diti, kohondot dilo’ apatut timbangon do koporintaan om SPR.
I Lee pogulu diti pinoruput minongunsub SPR papasaga’ rayat Sabah i haro id Semenanjung mongundi maya’ pos nung Pomilian Agayo Pogun Sabah pohoroon, montok papatantu’ kopotutan demokrasi diolo’ amu’ oolim gama-gama’ kohimpogongan sinodu’ om balanja’.
I Madius minongunsub nogi’ mooi do SPR om koporintaan pogun monorisid kogunaan undang-undang nogi’ karalano’ kopoindalanan undi pos miampai osisikap, kaampai popointutun sistem pongundian osopung om pawaya’an kointalangan kumaa mongungundi’ Sabah id labus pogun.
