KOTA KINABALU: Suruhanjaya Pongilagan Susuap Malaysia (SPRM) Pogun Sabah minanahan onom tulun kapaampai do limo kukumaraja’ koporintaan i poingkaraja’ doid songinan koupisan id watas Semporna di songkosodop.
Intodonon minoboros, koinsanai notondosan kusai kaampai songulun kukumaraja’ koporintaan i kotumbayaan sabaagi tulun popiromut tinahan tu’ kotumbayaan minokianu tusin susuap kikiro RM20,000 mantad songulun tulun ginumuan mooi do amu’ maganu laang kohondot di tanak dau i kotumbayaan pinopowonsoi kasalaan pinopoopi’ tumau pogonsok subsidi kiginumu’ kikiro 100 kutak i kotumbayaan owiton lumilisok kumaa labus pogun.
Tumanud intodonon, koinsanai notondosan kiumur pialatan 29 gisom 50 toun dilo’ kotumbayaan tinahan do upisor SPRM katalib minamaramit wookon mantad tusin susuap ilo’ soginumu’ kikiro RM5,000 mantad tulun ginumuan dilo’ di kikiro jam ko 10 songkosodop.
Daamot dilo’, Potunud SPRM Sabah, Datuk S. Karunanithy soira’ rinubaan pinopoimagon kinopomogombitan dilo’ om minoboros, kes dilo’ soriukon id sahau Seksyen 17(a) Akta SPRM 2009.
Ka disio kawagu, oinsanan notondosan minaan owito’ kumaa Kuut Sesyen Tawau montok kopokionuan reman di tadau baino’ montok tuduan ponoriukan potilombus.
