Hajiji pinapatahak tanda’mato kuminaa di Ma ontok minamaramit kinotombuluyan tapantang tinonudan komponi dilo’ miampai di Rubin (kotolu, wanan) id upis diso doid Menara Kinabalu, Kota Kinabalu, di tadau baino’.
KOTA KINABALU: Boyoon Montiri (KM), Datuk Seri Hajiji Haji Noor mamaramit di tongo’ papaapu’ sompogunan montok mangapu’ id Sabah, kaampai no mantad pomogunan China.
“Sabah toririmo mamaramit papaapu’ sompogunan mantad nombo-nombo pogun i orohian do mangapu’ id pogun diti. Ogumu’ siktor i aanu ampayaton toinsanan.
“Yati’ nopo nga’ pogun i osuau papaapu’ om lumansan do kosili rikoton koimbayat montok kopoopuan. Iti koponguhup papasarok po do kosunion ikonomi pogun,” ka disio.
Minoboros isio dilo’ ontok minamaramit kotombuluyan apantang mantad Huazhi (China) Limited Company id upis disio doid Menara Kinabalu, do hiti, di tadau baino’.
Huazhi binuruan di Timbang Presiden dilo’, Ma Haitao. Nokotindapou nogi’ i Ponorikohon Kotinanan Kopotundaan Ikonoim Sabah (SEDCO), Datuk Rubin Balang i minogowit tinonudan dilo’ kuminaa Sabah.
Tumanud di Ma, Huazhi i poinggompit id ogumu’ siktor pongindopuan sompogunan, kikorohian mangapu’ id siktor ginoris, tumau om gas, produk kitiknologi akawas, ponginsadaan rahat aralom om susuai id Sabah.
