Jamawi guminambar ‘swafoto’ miampai tongo’ graduan Longkod Pintoriningan Komulakan KPD-OISCA.
TENOM: Montiri Pomutanaman, Ponginsadaan om Pomorunan Akanon, Datuk Haji Jamawi Jaafar minongunsub di tongo’ graduan Longkod Pintoriningan Komulakan KPD-OISCA do popoinggayo pomusarahan om poposili kaganaan pomutanaman sabaagi karaja’, montok papatantu’siktor pomutanaman id Sabah kotilombus koburu’.
“Nung haro tana’ di amu’ po nobuat doid kampung nantadon, garason angkab om sunduan dokoyu do sumili moninimpuun om agropreneur omulok momoguno toilaan om komilaan di naanu,” ka disio ontok pinopoimagon Ramai Konvokesyen Ko-42 Longkod Pintoriningan Komulakan KPD-OISCA Tenom doid Lintuhun Mogisuaiguno KPD-OISCA, do hiti di tadau baino’.
Jamawi po nogi’ ADUN Melalap, pinoposotold o ramai dilo’ kirati kopio montok tongo’ graduan i nokopoindalan pinintoriningan solinaid 16 wulan, monimbauk toilaan om komilaan id mogisuaian kaganaan pomutanaman.
“Kada’ koikumai sumili momumutanom…”, ka di Jamawi minongunsub sunduan di tongo’ graduan.
Kolubukan molohing om paganakan i toririmo monokodung nakaramit nogi’ kopongunsikohan mantad no do tonggungan diolo’ minonuridong sinakagon omulok sumili tulun kiguno.
Jamawi (poindikau, tanga) guminambar pongingitanan miampai koinsanai graduan om tombului apantang.
Jamawi pinoposotol do ababayan pintoriningan i pinouyu kopiongoi di sondikoton koporintaan id kopogorisan Balajaran Teknikal om Pintoriningan Vokasional (TVET) id kaganaan pomutanaman montok papatantu’ kojominan om koumoligan takanon pogun do timpu dumontol.
Suai ko’ tuminanud kurikulum i nookunan do Koupisan Koburuon Komilaan Malaysia, longkod pintoriningan diti nga papatanom nogi’do nubasanan pintoriningan mantad OISCA Jipun i poposotol kogiroton ponguludan pomutanaman, kotolunan om pomogompian sandad posorili’.
Pointonod pinonuridongan dilo’, longkod diti momoguno prinsip ‘self-reliance’ om ‘self-sufficient’ maya’ kopolobusan wagas, kinotuan om tayam sondiri miampai amu’ tumalahan do bohogian kotolu, kopiongoi di konsep ‘Inggisaman Kabun Dompuran’ i pinointutunan kumaa rayat Sabah.
Jamawi minoboros, mogigiyion kaanu koundaran mantad kopogkikitan kos pomolian babarang kosusukupan takanon miagal daging manuk, tongo’ kinotuan om tuwawa’, suai ko’ kaanu nindopuan maya’ kapadagangan di noopod-opod asil pomutanaman.
Gatang koposion olidas maya’ kapangakanan kinotuan om tuwawa’ i haro ‘nutrisi’ nga’ aanu nogi papasarabak doid mogigiyon.
Jamawi (tanga’) guminambar miampai graduan katalib ramai konvokesyen dilo’.
Id inggisaman mongingkawas kalantaion susumikul, Komontirian Pomutanaman, Ponginsadaan om Pomorunan Akanon (MAFFI) Sabah suminain Pibatosan Pihunungan (MoU) miampai OISCA International Japan, nakapasaga’ pipiro susumikul osonong naangayan pootodon kumaa Jipun montok mindalan pintoriningan solinaid 1 gisom 3 toun.
Kalansanan di Jamawi konsep om sistem pomutanaman doun kaawagu i nopinsingilaan do hilo’aanu gunoon soira’ koguli’ id Sabah.
Minanangkabayahan kumaa oinsanan graduan, ginoris monunuduk om molohing, nunsub disio komulakan kikomilaan i rinamai di tadau baino’ do momoguno toilaan om komilaan di naanu, sumili moninimpuun id kaganaan pomutanaman, nogi’ monguhup kumaa koburuon siktor pomutanaman pogun.
Nokotindapou nogi’ Monguhup Montiri I, Datuk Haji Ruslan Muharam; Datuk Yussof Abdul Manan, Ponorikohon Kotinanan Potunud KPD; Monijor Agayo KPD, Jailis Masarip; Monguhup Monunurat Otuo Komontirian, Faridah Haji RAplee; Konsul Jeneral Jipun, Yamashita Yoshito om Monguhup Upisor Watas Tenom, Marcellus Joannes minongobi’ di Upisor Watas Tenom.
