Jamawi (kotolu, gibang) minongigit kinotuan opurak organik om guminambar miampai sawo, Datin Zainatunnisa Ibrahim (gibang), Dr. Jeffrey (kolimo, gibang), Madiyem (koduo, gibang) nogi’ ilo suai ontok kuminakap pokikitanan mogigiyon Kampung Kuyungon.
TAMBUNAN: Komontirian Pomutanaman, Ponginsadaan om Pomorunan Akanon (MAFFI) monilombus koburuon tanom takanon om pomutanaman maya’ kopoindalanan ababayan kiwaya’ akawas i kaanu mongingkawas nindopuan rayat nogi’ monginggirot kojominon akanon id pogun diti.
Montiri dilo’, Datuk Jamawi Jaafar minoboros, inggisaman po’ompus maya’ Koupisan Pomutanaman omm kotinanan poinggompit kotumbayaan kaanu mongingkawas rontob koposion rayat Sabah do poinpuli.
Minoboros isio dilo’ ontok pinopoimagon Pokikitanan Tohuri Projik Pomogompian Gouton Koiyonon Panagahan Wait om Popogoris Pomutanaman Kogiroton Kampung Kuyungan do hiti, di tadau baino’.
Minonongkounsikou kumaa manganganjur mantad kinapagalapan om kosiwatan minampai mogigiyon nokoiyonon, minamarayou i Jamawi di naangayan Kampung Kuyungan i komoyon do sabaagi wookon kampung bobos aparagat id watas Tambunan.
Jamawi minooi intong pokikitanan mogigiyon.
Wookon kinalantaion di nosigampot kaampai no nosili kampung kumoiso’ id Tambunan i pinopoburu’ ‘Protokol Komuniti’ om nogi’ kampung susukuon koubasanan pinotomod montok sakag obontol maya’ piuhupan miampai Univositi Putra Malaysia (UPM).
Suai dilo’, kampung po nogi dilo’ nga’ nakalantoi pinopoburu’ piromutan ‘jungle trail’ bobos anaru om bobos ogumu’ id Tambunan, suai ko’ pinapaharo ponombuluyan mimpau mogigiyyon (CoBT) nogi’ koburuon ‘Communitay Agribusiness’.
Jamawi minoboros, pinoilo nogi isio do mogigiyon Kampung Kuyungon pinopoindalan konsep ‘kebun dapur’ sabaagi inggisaman monokodung kotilombuson pangaba’ akanon id nayatan suang walai.
minoboros isio, kebun dapur po nogi nga’ wookon di tolu inggisaman wagu komontirian montok papagaras siktor pomutanaman mogigiyon.
“Popogoris do Ababayan Kebun Dapur pikikiro kaanu mongingkawas asil pomutanaman nogi’ kogompitan mogigiyhiyon mantad mogisusuai nayatan id siktor pomutanaman kumaa monigampot kojominan akanon.
“Ababayan dilo kikonsep kopolobusan tanom, ponginsadaan om pomutayaman kitukuran okoro tumanud di kosudongan kinoiyonon nogi kogoosan suang walai, suai ko’ manahak koposuulan kumaa kohompitan komulakan,” ka disio.
Jamawi minanangkabayahan nogi kumaa komulakan Kampung Kuyungon i minomili’ do minuli’ kampung om pinopoburu’ pongindopuan mimpau pomutanaman.
Jamawi (id likud koturu’, gibang) om Dr. Jeffrey (likud kaapat, wanan) guminambar pongingitanan miampai tutumanud bobos osonong moomoguno pomutanaman ogirot, Kampung Kuyungon.
Inggisaman koduo nopo nga’ Ababayan ‘Mentor-Mentee’ Pomutanaman i pinalan do komontirian sabaagi poginsomokan mongintutun sukod wagu i aparagat id kaganaan pomutanaman montok mangahak sakag posusuhut umampai id siktor dilo’.
Inggisaman kotolu kapaampai kogompitan mongungusaha’ pomorunan akanon id ikonomi digital montok popoinggayo pidagangan om mongingkawas nindopuan mongungusaha’ kopiongoi di kinoburuon maso-maso.
Ka disio, pongindomokan ikonomi digital nga’ kikosiwatan nogi’ mongimbulai lobi kogumu’ komulakan kiginoris id kopolobusan nogi’ kapamansaian akanon montok koonuan nindopuan di po’ompus.
Jamawi nga pinapahabar do Kampung Kuyungan pobontugon sabaagi kampung omitanan kumaa MAFFI montok monigampot angkab diti. kohondot dilo’, Jamawi nga tumombului nogi id watas suai montok mintong kosiwatan di kampung ngaawi do suai.
Kalansanan di Jamawi koinsanai sondikoton di pinoloting maya’ pongonjuran ababayan dilo aanu monigampot miampai poinlantoi.
minonongkounsikou nogi isio kumaa oinsanan bohogian i nokohompit pinapalantoi do ababayan nokomoi.
Nokotindapou nogi i Puru Lintuhun Undangan Pogun (ADUN) Keningau, DAtuk Seri Dr. Jeffrey Kitingan; Upisor Watas Tambnan, Sobitun Makajil; Luguan Watas Tambunan om OKK Philip Datuk Kitingan.
Posusuhut dilo’, i Jamawi tinanud di Monunurat Pointatap Komontirian, Datuk Leonard Stephen Poyong om Luguan Upisor Eksekutif Kotinanan Parai om Watas Sabah (LPBS) Datuk Dr. Madiyem Layapan minooi intong lot pinsingumbalan tanom Parai Hybrid mantad Wuhan, China, doid Kampung Rompon, Tambunan.
