Dairick (tanga’) tinanud di Molohingon Mongingia’, Herry Henny Tanasius pinaparamit gaa’ kinobontugan kumaa songulun susumikul rontob II.
TENOM: Montiri Pomutanaman, Ponginsadaan om Pomorunan Akanon (MAFFI), Datuk Jamawi Jaafar minoboros, komontirian disio popointutun mogisusuai inggisaman montok monginggumu’ kogompitan mogigiyon, lolobi no id Lintuhun Undangan Pogun (DUN) Melalap, id siktor pomutanaman om monigampot kojominan takanon.
Minoboros isio slogan “Berbudi Pada Tanah” gunoon sabaagi inggisaman mongunsub mogigiyon om momutanom, momukabun, momutayam nogi’ gumompit id kaparagatan kopohompit pomutanaman.
Minoboros isio dilo’ ontok pinopoimagon Ramai Apresiasi Susumikul (APM) Sikul Kabansaan (SK) Batu Tiningkang 2025 do hiti di baino’. Teks boboroson dau binasa’ di Monunurat Olisok kumaa di Jamawi, Dairick Frannandez Daniel.
Dairik (kotolu, wanan) guminambar pongingitanan miampai di Herry Henny Tanasius (koduo, wanan), Molohingon PIBG, Solehah Mohd. Salleh om tongo’ mongingia’.
Jamawi po nogi’ Puru Lintuhun Undangan Pogun (ADUN) Melalap minonongkounsikou kumaa bohogian sikul, Koisaan Molohing om Mongingia’ (PIBG) nogi’ koinsanai puru SK Batu Tiningkang mantad ninggisaman po’ompus do papabantug kalantaion susumikul.
Minoboros isio APM nopo nga’ ababayan tikid toun sikul i kituduan mongunsikou naangayan susumikul id kaganaan akademik, kokurikulum om pogogoyuon (sahsiah), suai ko’ manahak pongunsikohan kumaa oinsanan boogian i pinopouhup kumaa kinalantaion sikul.
Ka disio, ababayan dilo’ nga’ kosili nogi’ impohon montok pogirot piromutan bohogian sikul, molohing om mogigiyon nokoiyonon.
Kalansanan disio kopongokunan i pinatahak kumaa susumikul kosili pongunsub diolo’ tumilombus minggisom monigampot kalantaion id kaganaan akademik om kokurikulum.
Minonongkounsikou nogi’ isio kumaa molohing om mitatamong mantad tonggungan om sokodung po’ompus di pinatahak kumaa boogian sikul.
Pinopolombus i Jamawi kalansanan mooi do SK Batu Tiningkang kotilombus koburu’ om kabantug, suai ko’ lobi kogumu’ susumikul mamaramit gaa’ do timpu dumontol.
Minanangkabahayan isio kumaa oinsanna susumikul i nakaramit gaa’, om minonuhu’ molohing om boogian sikul do tumilombus momogompi’ piuludan om piuhupan montok mamagampot kalantaion do timpu dumontol.
Daamot dilo’, minonongkounsikou nogi’ isio kumaa mogigiyon mantad sokodung di pinatahak kumaa disio ontok Pinomilian Agayo Pogun (PRN) ko-17 di katatalib, om pinoposotol do tonggungan montok manahak surupukaraja’ bobos osonong sabaagi montiri kopiongoi di angkab om sondikoton pogun.
