KOTA KINABALU: Siktor ponombuluyan Sabah nokoposurat kinorikotan 2,826,390 tutumombului montok timpu wulan Koiso’ gisom Kosiam 2025 nokoinsawat 17 pihatus nung piadangon gimpu miagal toun nakatalib.
Montiri Ponombuluyan, Koubasanan om Sandad Posorili’, Datuk Jafry Arifin minoboros, mantad ginumu’ dilo’, 1,162,459 nopo nga’ tutumombului sompomogunan, nokoinsawat 17.2 pihatus, naamot 1,663,931 tutumombului suang pogun miampai kinoinsawaton 16.8 pihatus.
“Kinoingkawason agayo dilo’ nokopokito kotumbayaan tutumombului kumaa Sabah sabaagi rikoton ponombuluyan pilion i opuawang do kinolumison sandad posorili’ nogi’ kopogisusuaian koubasanan.
“Ginumu’ tutumombului diti pikikiro kotilombus koinggumu’ miampai osonong om ogirot dumontol koompokon toun diti,” ka disio ontok Ramai Kinopoimaganan Malam Lestari ‘Irama dan Alam’ Rhythm of Kinabalu (ROK) 2025, di tadau Koonom.
Teks boboroson disio binasa’ di Monguhup Montiri Ponombuluyan, Koubasanan om Sandad Posorili’, Dr. Andi Md. Shamsureezal Mohd. Sainal.
I Jafry pinopoilo do kopongonjuran festival ponombuluyan om koubasanan miagal ROK kapapanau tonggungan oponsol id koposiahan pomorunan ponombuluyan kopiongoi di inggisaman kopointutunan po’ompus do koporintaan pogun.
“Id haal diti, ababayan ponombuluyan koubasanan kiguno pointutunan om poonjuron miampai aparagat om pointantu’ timpu.
“Ilo’ do potilombus kouhup, papasarok nogi’ monokodung koonuan ikonomi artis nokoiyonon, mongingindapu’ produk seni koubasanan, mongungusaha’ tinunturu’ nokoiyonon, poposodia’ taakanon om tinumon om nogi’ bobos oponsol popointutun kinolumison pogun Sabah,” ka disio.
Daamot dilo’, pinokianu disio oinsanan bohogian do tumilombus miuhup monokodung pomorunan ponombuluyan pogun montok papatantu’ Sabah kotilombus sabaagi rikoton kiginoris tumopong id nayatan nasional om sompomogunan.
Ababayan ROK 2025 nakapanau solinaid apat tadau minimpuun di tadau Kolimo.
Nokotindapou nogi’, Monunurat Pointatap Komontirian Ponombuluyan, Koubasanan om Sandad Posorili’, Datuk Josie Lai, Kumoduo Luguan Potunud (Koubasanan om Kesenian) Koupisan Koubasanan om Kesenian Negara (JKKN), Mohd Radzi Omar nogi’ Potunud JKKN Sabah, Marina Abu Bakar.
