Foto/ intodonon: Facebook Dr. Joachim Gunsalam
KUNDASANG: Calon Gabungan Rakyat Sabah (GRS), Datuk Dr. Joachim Gunsalam minomusus timpohon Lintuhun Undangan Pogun (DUN) N 36 Kundasang miampai kinalantaion agayo id Pomilian Agayo Pogun Lintuhun Undangan (PRU DU) Sabah ko-17.
Tumanud kootusan pohimagon Suruhanjaya Pomilian Agayo (SPR), Dr. Joachim nakaanu 4,640 undi, minangala’ 10 mononongkiala’ suai, potilombus idno nokoposurat majoriti 1,031.
Ponokisahap osomok disio, calon Bebas (Kunci), Jackson Musi nakaanu 3,609 undi, sinusuhut di Jattriy Abie @ Jeffrey Mohd Ali (KDM – 2,833 undi), Japirin Sahadi (BN – 1,877 undi), Atong Antong (PN – 154 undi), Jeffrey Gopog (Warisan – 986 undi), Datuk Japiril Suhaimin (SAPP – 1,279 undi), Rogers Tiam (UPKO – 530 undi), Nazarul Khaiwala Wahab (Anak Negeri – 44 undi), Edward Jamkim (PIS – 64 undi) nogi’ pipiro calon suai i minonongkiala.
Soginumu’ 194 undi nada’an.
Id kointalangan kumoiso’ disio katalib kinalantaion, Dr. Joachim po nogi’ Ponowoli Presiden Parti Bersatu Sabah (PBS) minonongkounsikou kumaa koinsanai mongungundi nogi’ tiim kukumaraja’ i minonotos pinapalantoi kimpin po’ompus timpu PRN.
“Kounsikahan ku au’ gigina’ kumaa koinsanai pakakaraja’ om mongungundi. Kanou tokou no mongukab bolikan di wagu om misompuru ogirot montok DUN Kundasang om koinsanai pogun Sabah,” ka disio.
Minoboros isio, kinalantaion dilo’ minanahak mandat wagu montok monilombus kaparagatan koburuon id Kundasang nogi’ papatantu’ kotundunan mogigiyon kotilombus otingkananan.
