Hajiji pinopolombus taru karaja’ sabaagi Boyoon Montiri id Istana Seri Kinabalu, Kota Kinabalu di tadau baino’.
KOTA KINABALU: “Pounsikou mantad mandat diti. Kalantaion nopo diti nga’ kinalantaion rayat. Pasanganu iti do tikid dokoyu i otumbayaan kumaa ‘visi’ tokou, monokodung inggisaman tokou, om miilang imanon tokou montok timpu dumontol Sabah lobi kanawau,” ka di Ponorikohon Gabungan Rakyat Sabah (GRS), Datuk Seri Haji Hajiji Haji Noor.
“Miampai poinponu’ kounsikahan, romiton ku kotumbayaan i pinatahak dokoyu doho’ om koombolutan ku id Gabungan Rakyat Sabah montok insan po momuruan om sumurupu karaja’ sabaagi mobi rayat dokoyu.
“Sokodung rayat i amu’ nopiduo om kotumbayaan diolo’ kumaa poburuon tokou nosili posunduran kumaa kinalantaion diti.
“Kanou tokou mongunsikou kinalantaion diti sabaagi ponimuunan id songinan ‘bab’ wagu, i noponu’ do sondikoton i noinwoguan nogi’ angkab oinsanan montok monuridong timpu dumontol di lobi kosonong montok Sabah om rayat dau,” ka disio.
Hajiji minamaramit watikah koposilihan mantad di Tun Musa id Istana Seri Kinabalu di tadau baino’.
Hajiji minoboros, pointonod kolimpuunon po, tonggungan GRS nopo nga’ montok patanom kosimbanon om komogoton maya’ ababayan koburuon po’ompus om kopotonggoi ngaawi ‘Sondikoton Sabah Maju Jaya’ (SMJ).
“Minggisom tokou montok popogura’ koburuon di kirati o monuridong jambatan i koponompuru, okon ko’ kopotongkiad. Poingkakal tokou ogirot id koptotilombusan SMJ 2.0, i moningkanan kumaa apat tukod osuul: Sabah Posuulon (Sabah First), Sabah Maju (Sabah Foward), Sabah Sejahtera (Sabah Prosper) om Sabah Bersatu (Sabah United).”
Hajiji nga’ pinoposotol nogi’ tonggungan poinponu’ GRS montok kumaraja’ amu’ otitingkod montok popoburu’ angkabon om pokikionuon oinsananan rayat Sabah.
“Oinsanan tokou, monoguang do kaantaban, monongkiahou kosiwatan wagu, om papatantu’ tikid rolou, sundung pia do poingkuro kinoro’, orongou om agatang.
“Kanou tokou do tumilombus miuhup sabaagi tambalut miilang aparagat id pamanahon komogoton diti. Miamapi pisompuruan sabagi ginaras tokou, kanou no lumaang kumaa toguang oinsanan om papatantu’ kinalantaion diti otootopot koowit rati.
“Kumaa oinsanan ponokosahap i monongkiala’ miampai dati’ po’ompus pomilian agayo diti, kanou tokou no popogirot saf om mongiggit sunduan demokrati miampai misomputu. Kanou tokou monuridong kotumbayaan om kiangkab montok kumaraja’ sopiuhup montok surupukaraja’ kumaa rayat miampai kiwaya’ om montok koundaran Sabah miampai poinpuli,” ka disio.
