Masiung (kotolu, gibang) miampai calon GRS Sungai Sibuga, Datuk Amir Shah Yakob (kaapat, gibang).
SANDAKAN: Ababayan koburuon i nokoindalan om mamaso palanon id Sabah amu’ kalantoi nung rayat tumilombus maganu ‘risiko’ mongolon koporintaan miampai asaru.
Timbang Presiden Parti Gagasan Rakyat Sabah (Gagasan Rakyat), Datuk Masiung Banah pinoposorou do kosimbanon koporintaan lobi kogumu’ mogowit koimamangon kumaa rayat om pogun nung paadangon di kosonongon.
“Soira’ koporintaan miolon, nga’ katatapan kosimban nogi’, katatapan wagu wonsoiyon, projik koburuon i masaan om maan poindalano’ ohimpogongan.
“Gama-gama’ dilo’ rayat mananggung korugion soira koburuon i mamaso poindalan amu’ aanu monilombus,” ka disio pinoposotol ontok rinubaan media katalib bokimpin monguhup calon Gabungan Rakyat Sabah (GRS) id DUN Sekong om DUN Sungai Sibuga do hiti, konihab.
Ka id Masiung, nung haro koporintaan wagu, kososolugan dilo’ maganu timpu duo gisom tolu toun montok mongulud pomorintaan, monuridong puruankuasa om momonsoi katatapan. Nanamot koporintaan GRS, ka disio, kiharo no palan poinharo mantad montok tilombuson.
“Kotilombusan koporintaan GRS oponsol montok mongilang koburuon pogun diti ohimpogongan, om papatantu’ kaadangon pulitik i noondo diti popuriman kotilombus ogompi’.
“Susuyan laid nokopokito do soira’ pulitik amu’ ogirot om koporintaan asaru miolon longon, ababayan koburuon nogi’ inggisaman di napalan amu’ aanu monilombus…. tohuri nopo nga’ rayat i mamaramit do waya’ dilo’.”
Masiung otumbayaan calon GRS id DUN Sekong, Puan Sri Diana Hamdan Diego om calon GRS id DUN Sungai Sibuga, Datuk Amir Shah Yakob kiharo ginaras poinpoopori montok magahou goduduo timpohon dilo’ mantad pembangkang.
