Hajiji (toguang, tanga’) miampai calon, lansanon om mononokodung GRS ontok ababayan miampai rayat Lumadan om Klias id Beaufort di tadau baino’.
BEAUFORT: Gabungan Rakyat Sabah (GRS) kiangkab sumili songinan koporintaan di aadang om aadas, ilo’ prinsip di tilombuson mongigit nung oonuan mandat wagu do rayat do ko 29tw Kohopod om Iso’ diti, ka di Boyoon Montiri i po nogi’ Ponoirkohon GRS, Datuk Seri Haji Hajiji Haji Noor.
Minoboros isio, GRS kiharo ababayan atalang montok momorikot prinsip dilo’, miagal pinoloting id manifesto pomilian agayo dau, i pinopoulud apat posunduran agayo: Sabah Posuulon (Sabah First), Sabah Lumaang kumaa Toguang (Sabah Foward), Sabah Maju Jaya (Sabah Prosper) om Sabah Bersatu (Sabah United).
“GRS nokopokito no ginoris momorinta’ pogun miampai kiwaya’ po’ompus limo toun nakatalib. Nakalantoi tokou pinopoburu’ Sabah maya’ mogisusuai inggisaman.
“Minonguhup tokou nogi’ do rayat id pototongkop pogun amu’ momuntuk tinaru toi ugama’. GRS otootopot doid kopoburuan Sabah.
“Mokianu tokou mandat wagu montok monilombus palan diti,” ka di Hajiji id ramai miampai rayat doid Dataran Bagandang do hiti di tadau baino’.
Hajiji guminambar miampai tombului id ababayan miampai rayat Lumadan om Klias id Beaufort di tadau baino’.
Nokotindapou nogi’ tongo’ calun GRS, yolo’ nopo i Datuk Isnin Aliasnih (Klias) om Datuk Ruslan Muharam (Lumadan), nogi’ Puru Parlimen Sipitang Datuk Matbali Musa om i Luguan Koonduan GRS, Datuk Azizah Mohd. Dun.
Boyoon Montiri minoboros, koporintaan pogun buruanon GRS nokosigampot kinalantaion agayo, kosuul no id inggisaman minononduli’ ikonomi Sabah katalib pandemik Covid-19 maya’ inggisaman Sondikoton Sabah Maju Jaya (SMJ).
Maan do paagalan, minoboros isio, mogigiyon Sipitang om koiyonon pososorili’ dilo’, miagal Lumadan om Klias, karamit koundaran mantad linabai ikonomi kinoburuon Taman Pomorunan Tumau om Gas Sabah (SOGIP).
“Pibatosan i sinoinan miampai ogumu’ komponi montok monimpuun karaja’ diolo’ om noondo SOGIP nosuangan poinponu’,” ka disio.
Hajiji minongibit tanak mononokodung parti id koyuon osuau soira’ nokorikot doid Dataran Bagandang, Beaufot di tadau baino’.
Hajiji pinoposotol do sundung koporintaan pogun buruanon GRS moningkanan kumaa projik ngaawi agayo montok koburuon Sabah, kotundunan rayat amu’ insan tolibai.
“Soira’ dahai koguli’ sumili koporintaan do ko 29tw Kohopod om Duo diti, monimbang yahai kapanahakan ponguhupan kumaa oinsanan mogigiyon nolohing kosudong kiumur 60 toun poingkawas. Iti no angkab dahai, monguhup yahai do rayat,” ka disio.
Minoboros isio, suang timpu limo toun, ginumu’ mamaramit kotundunan nokoingkawas mantad 30,000 kuminaa 70,000 tulun.
Noputan disio do mimpuun otun diti, kikiro 100,000 luguan suang walai i poingulud id ababayan e-Kasih nakaramit RM300 tikid wulan.
Pinosotol disio do GRS monilombus inggisaman dilo’ suai ko’ popointutun ababayan wagu montok kotundunan rayat om komogoton Sabah soira’ koguli’ sumili koporintaan.
Nunsub po nogi’ disio pakakaraja’ pomilian agayo GRS do tumilombus kumaraja’ agaras montok papatantu’ kalantaion calun sompoopori.
