Haji Hajiji Haji Noor
KOTA KINABALU: Gabungan Rakyat Sabah (GRS) di tadau baino’ pinapahabar noolu’ apat po calon piomungan dilo’ i tumanding id Pomilian Agayo Pogun Lintuhun Undangan Pogun (DUN) Sabah ko-17.
Boyoon Montiri i po nogi’ Ponorikohon GRS, Datuk Seri Haji Hajiji Haji Noor minoboros, miampai kinapahabaran dilo’, nuludan poinponu’ 55 calon GRS i tumanding id pomilian agayo diti baino’ nogonop.
Dr. Bonaventure Boniface
Apat calon dilo’ nopo nga’ i Dr. Bonaventure Boniface (N14 Tamparuli), Rafie Robert Tawik (N40 Bingkor), Samsiah Usman (N70 Kukusan) om i Datuk Hassan A. Gani Pg. Amir (N73 Sebatik).
“Oinsanan calon diti kiharo ningkakaton, bakat om nawawaya’an di mogisusuai. Otumbayaan oku kaanu yolo’ mogowit kalantaion kumaa GRS id pomilian agayo diti baino’,” ka disio id kapahabaran media do hiti, di tadau baino’.
Rafie Robert Tawik
Hajiji insan po minokianu oinsanan mononokodung om pakakarjaa’ parti do misompuru papatantu’ kalantaion GRS, montok papasaga’ koporintaan buruanon piomungan dilo’ kotilombus oonuan mandat montok monilombus karaja’ koburuon id Sabah.
Di tadau Kotolu, Hajiji nakapahabar 51 calon GRS i tumanding id PRU DUN Sabah ko-17, kapaampai do piomungan lansanon kinawawaya’an om calon omulok, miampai 35 pihatus mantad diolo’ kapaamapi mantad wuros wagu.
