Joniston (kolimo, gibang) miampai di Kassim om Teo pinopokito sunduan pisokodungan miampai pinapalahat sunduan GRS “Rumah Kita, Kita Jaga!”.
TUARAN: Miampai tadau pomungaranan calun okuri’ ko’ duo minggu, kopomuruanan siriba’ Parti Bersatu Sabah (PBS) om Parti Gagasan Rakyat Sabah (Gagasan Rakyat) pinopototos inggisaman koponguludan montok papatantu’ Gabungan Rakyat Sabah (GRS) kopomusus timpohon Lintuhun Undangan Pogun (DUN) Kiulu, id tanga’ pikikiraan pialaan mogisusuai sunduk.
Pinopokito sunduan pisompuruan om kososodia’an, goduduo parti komponen dilo’ di tadau baino’ tuminimung id bingkil ejen mongundi om ejen pongintaban undi (PACA) pinaanjur kukumaraja’ pomilian agayo GRS Kiulu id Tamparuli.
Bingkil dilo’ moningkanan kumaa kopoinggirotan koponguludan karaja’, manahak kopoilaan kumaa ejen karait kooturan pomilian agayo nogi’ mongingkawas sunduan piuhupan dumontol tadau pongundian.
Nokotindapou nogi’ i Luguan Kopointalangan GRS om PBS, Datuk Joniston Bangkuai; Luguan PACA pogun GRS i po nogi’ Kumoduo Luguan Gagasan Rakyat Sulaman, Abdul Kassim Razali; om Kumoduo Luguan Gagasan Rakyat Kiulu, Datuk George Teo.
Ka di Joniston, piuhupan pialatan PBS om Gagasan Rakyat id Kiulu kopokito ginaras GRS sabaagi piomungan i popososotol pisompuruan om disiplin id nayatan parti komponen dau.
“Piuhupan id nayatan siriba’ diti nopo nga’ turianan poingkuro tongo’ parti komponen GRS kaanu miuhup miampai kiwaya’ montok sondikoton toinsanan.
“Tingkananon dahai okon ko’ kumaa disai sahapon dahai, nga’ papatantu’ tikid undi opitamangan om tikid kopoindalanan kapanau oturundus.
“I nopo pokionuon do rayat nga’ koporintaan i monumboyo’ batos, om ilo’ no i tilombuson popowonsoi do GRS. Mimang yahai monimporon kotumbayaan dilo’ miampai kumaraja’ sabaagi iso’ tiim,” ka disio.
Joniston i po nogi’ mongigit timpohon DUN Kiulu, nointutunan sabaagi lansanon di abalangas popoburu’ koburuon id watas dau, kaampai monginggirot ponombuluyan labus kakadayan om pomutanaman nogi’ popomogot infrastruktur om pamalanan mogigiyon montok kasasangan rayat nokoiyonon.
Daamot dilo’, Abdul Kassim minoboros, i Joniston nakaramit sokodung ogirot id nayatan siriba’ mantad no do kopomuruanan osuau rayat om inggisaman po’ompus diti id koburuon mogigiyon.
Ka disio, karaja’ agaras di Joniston i nakalantoi pinoposili Kiulu sabaagi hab ponombuluyan om pomutanaman di aparagat koburu’ kopokito tonggungan disio id koponginsonongan rontob koposion nogi’ mongukab kosiwatan wagu kumaa mogigiyon.
Daamot dilo’, i Teo minoboros, kinorikotan kikiro 200 lansanon nayatan siriba’ mantad PBS om Gagasan Rakyat id kopointalangan PACA dilo’ kopokito sokodung ouli’ kumaa calun GRS nogi’ kososodia’an kukumaraja’ parti montok papatantu’ kapapanaho’ pomilian agayo kapanau miampai oturundus om oulud.
“Bingkil diti kouhup dahai mongulud karalano’ om papatantu’ tikid pakakaraja’ karati tonggungan sompoopori. Ilo’ somboogian mantad inggisaman dahai do papatantu’ oinsanan kapapanaho’ kapanau miampai oulud om pointulid,” ka disio.
