Hajiji guminambar pongingitanan miampai Felo SMJ 4.0.
KOTA KINABALU: Ababayan Felo Sabah Maju Jaya (SMJ) i pinointutunan do koporintaan pogun nokointalang do nakalantoi minongukab waya’an kumaa sukod wagu Sabah do mimang buru’ nogi’ popouhup miampai mitilombus kumaa ekosistem koburuon pogun, ka di Boyoon Montiri, Datuk Seri Haji Hajiji Haji Noor.
“Ababayan Felo SMJ nopo nga’ impohon oponsol okon nopo ko’ montok monuridong nawawaya’an, nga nogi’ monuridong ginirot tinan, tonggungan om koyuon kopomuruanan abantug.
“Kopiongoi ilo’ di tonggungan koporintaan pogun id kerangka Palan Sondikoton Sabah Maju Jaya (SMJ), i poposotol koburuon ‘modal insan’ sabaagi pogura’ oponsol id koponuridongan timpu dumontol pogun di ogirot om kiginaras tumopong,” ka disio.
I Hajiji minoboros dilo’ id ramai kinapatahakan watikah kuminaa di 42 tutumanud Felo SMJ 4.0 id Menara Kinabalu, do hiti, di tadau baino’.
“Okon nopo ko’ mongimbulai tokou lansanon di abantug id sunduk toilaan om komilaan, nga nogi’ lobi koponsol, lansanon i kiginawo rayat – i kaanu momuriman kotub ginawo mogigiyon, mogowit rolou rayat kumaa mija katatapan, om monimbuat sunduan mongupus pogun kolobi ko’ koponsolon sondiri,” ka disio.
Boyoon Montiri lumansan tongo’ felo kosili ponokodung kosimbanon miampai poposindak obor kopomuruanan di otulid ginawo, kobulun om kipomusarahan osodu’ montok poposili Sabah lobi komogot, misompuru om kalantoi.
Pinokinau disio tongo’ felo ngaawi’ do momoguno poinponu’ kosiwatan dilo’ montok mamarati koyuon di otopot kopomorintaan koporintaan pogun – kaampai poingkuro koponuridongan katatapan, kapamansaian kootusan, om kukumaraja’ koporintaan poguraon montok koponsolon rayat.
Hajiji guminambar ‘swafoto’ miampai Felo SMJ 4.0.
“Silihon timpu sabaagi felo diti kosiwatan kopomuruanan montok monuridong disiplin, kopodulianan, angkab om kobulunon. Poilihon tonggungan sabaagi giniros tinan.
“Onuo’ no kosiwatan diti montok popokito do sukod wagu kaanu papatahak pomusarahan osonong, popouyu kapanalasaian di kobulun om kopomuruanan maya’ karaja’ di kiwaya’,” ka disio.
Hajiji pinoposotol do sukod wagu okon nopo ko’ tumungkus, nga tataba’ oponsol om tumungkus timpu dumontol i masaan turidongon do noondo diti.
“Mamason oku kopisanangan koburu’ kumaa oinsanan Felo SMJ. Silihon nawawaya’an diti sabaagi impuunon pamanahan kopomuruanan i kapanahak koundaran kumaa rayat om pogun. Kalansanan ku mooi do sukod wagu diti monilombus kopomuruanan montok mogowit Sabah kumaa timpu dumontol di lobi kabantug,” ka disio.
Minamarayou nogi’ isio komponi poinhompit koporintaan (GLC) i minaganu bohogian id ababayan dilo’ mantad tonggungan om kinatatapon diolo’ id koponokodungan koburuon modal insan id Sabah.
“Pinoilo oku do diti baino’ soginumu’ 20 GLC nokohompit id kinopoindalanan ababayan Felo SMJ, nung piadangon di 10 no pogulu diti. Kinoinsawaton diti okon ko’ numbur nopo, nga’ kopokitanan kotumbayaan nogi’ sokodung ouli’ i kopokito piuhupan ogirot pialatan koporintaan pogun om GLC id kopongimbulaian nuludan lansanon omulok timpu dumontol.
“Pinoilo oku nogi’ do ogumu’ felo i pinouyuhan kosiwatan sumompuru GLC sompoopori katalib opupusan ababayan. Iti nopo nga’ kinoburuon di kopoondos no kopio,” ka disio.
Hajiji minongunsikou nogi’ inggisaman po’ompus Komontirian Komulakan om Spoot Sabah (KKBS) id kapamalanan nogi’ pinopoindalan ababayan i nosili koiyonon oponsol papatarom bakat kopomuruanan, monuridong ginoris tumopong, om momoomongo sakag tumungkus pogun kumaa timpu dumontol di lobi kiginoris tumunda’.
