Ewon guminambar miampai tongo’ mongindapu’ Keningau i minamaramit ponguhupan mantad TEKUN Nasional.
KENINGAU: TEKUN Nasional kotinanan id siriba’ Komontirian Koburuon Mongindapu’ om Koperasi (KUSKOP) pinapatahak ponguhupan kiginumu’ RM109 riong kuminaa 4,675 mongindapu’ TEKUN id pototongkop Sabah id timpu wulan Koiso’ gisom Kosiam toun diti.
Montiri Koburuon Mongindapu’ om Koperasi, Datuk Ewon Benedick minoboros, mantad ginumu’ dilo’, Parlimen Keningau minamaramit soginumu’ RM8.6 riong ponguhupan montok 444 mongindapu’ TEKUN montok timpu di miagal.
Minoboros isio, ginumu’ ponguhupan i pinatahak kumaa mongindapu’ TEKUN id Sabah do toun diti nakatalib mantad sondikoton osopung toun 2025.
“Miampai koinsanai dilo’, pointonod tinuridong di toun 1998 gisom tulan Kosiam 2025, TEKUN Nasional nakapatahak RM1.26 bilion kuminaa 67,248 mongindapu’ id Sabah. Montok Parlimen Keningau nopo, soginumu’ RM57.6 riong pinatahak kumaa 2,904 mongindapu’ id suang timpu dilo’,” ka disio.
Minoboros isio dilo’ id Ramai Sopisuau Mongindapu’ TEKUN Nasional id Lintuhun Tomuan Aki Taingadon, Tomu Kakadayan Bingkor, do hiti, di tadau baino’.
Ka di Ewon, koporintaan toririmo popo’iliu siktor pongindopuan okoro’ om gonsuhatan (PKS) nogi’ pomorunan mikro sabaagi posunduran kopio kobuuron ikonomi pomogunon, kosuul no id pogun diti i opuawan do kosiwatan kopongindopuan.
“Mongingindapu’ okon nopo ko’ kaanu nindopuan montok tinan om paganakan, nga kopongukab kosiwatan pakarajaan nogi’ popogura’ ikonomi mogigiyon nokoiyonon,” ka disio.
Minoboros isio, Bajet 2026 ki’uhu “Belanjawan Rakyat” i pinawalad di Luguan Montiri, Datuk Seri Anwar Ibrahim, kopokito tonggungan koporintaan do amu’ popoindisan mongingindapu’ PMKS.
“Maya’ do bajet dilo’, mogisusuai kogogonopan om jominan koponguhupan kigatang RM2.5 bilion pinoobi’ kumaa kotinanan kaampai TEKUN Nasional om Bank Simpanan Nasional (BSN) montok koundaran mongingindapu’ mikro,” ka disio.
Ka wagu disio, id siriba TEKUN Nasional nopo, soginumu’ RM550 riong pinoobi’ montok kogogonopan ponguhupan kumaa mongindapu’ okoro’, kaampai RM50riong kosuul montok Skim Koponguhupan Mongindapu’ Mogigiyon India (SPUMI).
Id sunduk koburuon mongindapu’ id Sabah, ka di Ewon, KUSKOP om kotinanan dau kaampai TEKUN Nasional tumilombus popointutun ponginsomokan kopisudong do sosioikonomi nokoiyonon, wookon nopo Skim Ponguhupan Mongindapu’ Tomu (SPUT) i tinuridong montok monguhup papadaadagang om mongingindapu’ okoro’ id pasar tomu.
Pointonod pinointutunan skim dilo’ di toun 2023 gisom ko 5tw Kosiam 2025, soginumu’ RM9.8 riong pinatahak kumaa 2,294 mongindapu’ id pototongkop Sabah.
“Iti kokitanan tonggungan TEKUN Nasional papagaras ikonomi rayat maya’ koponguhupan mikro, kosuul no montok mogigiyon labus kakadayan,” ka disio.
Ewon minongunsub mooi lobi kogumu’ mongindapu’ nokoiyonon, kosuul id Bingkor om koiyonon pososorili’, sumolod kosiwatan montok mongupalai koponguhupan id siriba’ mogisusuai skim TEKUN miagal do Skim Ponguhupan Informal & Mikro (SPIM) om SPUT.
“Kalantaion pongindopuan okon i ko’ tumanud do modal nopo, nga nogi’ toilaan om komilaan kopongindopuan. Tumanud no do pintoriningan om pangahakan i pinosodia’ mogisusuai kotinanan id siriba’ KUSKOP,” ka disio.
