Hajiji (poungkakat, tanga’) miampai susumikul SAN Pekan Tambunan.
TAMBUNAN: Sikul Ugama Pogun (SAN) Pekan Tambunan i noumpadanan do kinotutudan di ko 12tw Kohopod katatalib minamaramit ponguhupan kiginumu’ RM260,000 mantad koporintaan pogun, Yayasan Kotundunan Sabah (YKS) om Kounsol Ugama’ Islam Sabah (MUIS).
Ponguhupan dilo’ kopohompit do RM200,000 mantad koporintaan pogun do pomoli timpohon, mija om kogogonopan sikul, RM50,000 mantad YKS nogi’ RM10,000 mantad MUIS.
Boyoon Montiri, Dautuk Seri Haji Hajiji Haji Noor pinapatahak ponguhupan dilo’ ontok kotombuluyan disio kuminaa sikul dilo’ di tadau baino’. Molohingon Mongingia’, Ustaz Ahmad Subri Janing ruminamit ponguhupan id koobian sikul.
YKS nga’ pinapatahak nogi’ ponguhupan tusin tunui om babarang kogunoon kumaa 20 susumikul asrama om 100 susumikul i noumpadanan do kinotutudan dilo.
Hajiji minintong linimpu sikul i nopupu id kinotutudan doid SAN Pekan Tambunan.
Ka di Hajiji, norikot nodi timpu SAN Pekan Tambunan, i tinuridong di toun 1970-an, kiharo linimput pointatap sondiri.
“Mantad kopokionuan sikul, paatagon ku mooi do SAN Pekan Tambunan turidongon kawagu. Koporintaan pogun popolulus kopoobian di gunoon om tuminingan oku do tadau baino’ montok mintong sondiri’ poingkuro tokou kaanu monguhup,” ka disio.
Kinotutudan di sodopon ko 12tw Kohopod dilo’ nokopomupu duo linimput kaampai pisuk darjah om asrama, naamot kuarters mongingia’ nga’ naraag.
Nokotindapou nogi’ i Montiri Sains, Tiknologi om Inovasi Datuk Dr. Mohd. Arifin Mohd. Arif; Upisor Watas, Sobitun Makajil; Potunud Koupisan Haal Ugama Islam Pogun Sabah (Jheains) Jumain Abdul Ghani om i Potunud YKS, Datuk Diyanah Abdullah.
