Haji Hajiji Haji Noor
TAMBUNAN: Gabungan Rakyat Sabah (GRS) om Pakatan Harapan (PH) nokopoimagon piikidan timpohon sompoopori i maan pahabaro’ ontok Tadau Pomungaranan Calun montok Pomilian Agayo Pogun ko-17 (PRN17).
“Oh, noilaan do dahai (pogiikidan timpohon), nga’ amu’ oku kaanu papahabar do noondo. Indadon nopo ontok Tadau Pomungaranan Calun om oilaan dokoyu ginumu’ dilo’,” ka di Boyoon Montiri, Datuk Seri Haji Hajiji Haji Noor i po nogi’ Ponorikohon GRS.
Minoboros isio dilo’ soira’ nudio karait ningkakaton pibabarasan piikidan timpohon pialatan GRS om PH montok monoguang PRN17.
Hajiji nga’ pinopoilo nogi’ do manifesto GRS maan poimpuuno’ katalib Tadau Pomungaranan Calun.
“Popouyu yahai di bobos osonong kumaa rayat Sabah,” ka disio soira’ rinubaan katalib kuminakap Sikul Ugama’ Pogun (SAN) Pekan Tambunan do hiti di tadau baino’.
Ka disio, kotumbayaan akawas kumaa sokodung rayat mimpau rikod pomorintaan osonong GRS-PH po’ompus limo toun nakatalib.
“Nokoponigampot yahai ogumu’ kinalantaion maya’ mogisusuai kaparagatan sosioikonomi montok rayat, kaampai minogowit sumuang kopoopuan kiwaya’ akawas montok papasarok koburuon ikonomi Sabah.
“Pinapabalanja’ nogi’ yahai lobi RM1.3 bilion montok inggisaman koburuon modal insan, suai ko’ pinapatahak ponguhupan tulan-tulan kiginumu’ RM300 kumaa tinimungan mosikin ‘tegar’ id nuludan e-Kasih.
“Suai dilo’, kinalantaion nga’ nokosurat nogi’ id pomorunan tumau om gas. Pembangkang pikikiro doti’ do mumbal mogolim naangayan diti, nga’ otumbayan oku do rayat noondo nosukod om mamagatang inggisaman nogi’ asil di nosigampot,” ka disio.
Hajiji mongiikiro nogi’ koyuon PRN diti baino’ lobi karamai nosusuhut ogumu’ parti pulitik i pinopolombus angkab montok tumanding.
“Kanou tokou mongunsikou demokrasi,” ka disio.
