Armizan pinopoimpuun Skim Gatang Maksimum karamaian Deepavali 2025.
KOTA KINABALU: Montiri Pidagangan Suang Pogun om Kos Balanja’ Masi (KPDN), Datuk Armizan Mohd. Ali, pinoposotol do kopoindalanan Skim Gatang Maksimum Timpu Karamaian (SHMMP) Deepavali 2025 kituduan montok mongimbulai koyuon sopikalantoi kumaa moomoguno om mongindapu’, kopiongoi di inggisaman koporintaan papatantu’ kaadangon gatang babarang kogugunoon dumontol timpu kararamaian.
Minoboros isio, skim i poinggirotkuasa’ solinaid turu’ tadau mimpuun ko 16tw gisom ko 22tw Kohopod 2025 dilo’ manamong gatang siam ponit babarang, kaampai daging kambing nudar, tomato, lado aragang, bawang aragang okoro’ India (kaampai ponit Ros), bawang aragang agayo nudar, kacang dal Australia, piasau posonginan om piasau kiningkin.
“Laang nopo diti nga’ kopongoputan kumaa kinopoindalanan SHMMP toun pogulu dilo’ miampai pinomoruhangan iso’ ponit barang pitamangan wagu ilo’ nopo nga’ bawang aragang okoro’ India.
“Koporintaan manu papatantu’ moomoguno kaanu gatang poinpatut miampai amu’ koponginggorit mongingindapu’,” ka disio id iso’ kointalangan media di tadau baino’.
Armizan minoboros, timpu kopoindalanan skim solinaid turu’ tadau dilo’ kopohompit apat tadau pogulu karamaian, sangadau ontok timpu karamaian om duo tadau talib dilo’. Timpu dilo’ pinatantu’ tumanud ponimbangan koyuon maso-maso miagal kos, kopokionuan om kopouyuhan, koyuon tawan om rontob gaji.
Pinointalang disio, koponontuan gatang maksimum (bobos akawas) maganu nogi’ kokiraan pomusarahan Komontirian Pomutanaman om Kojominan Takanon (KPKM), kotinanan koporintaan om papamanau pomorunan montok papatantu’ pangaba’ di kogonop po’ompus timpu kopoindalanan skim.
“Upisor Pogirot Kuasa KPDN poguraon kumaa pototongkop pomogunon id koiyonon di kosudong miagal pasar ginumuan, pasar tani om longkod pomoobolian montok papatantu’ kotonudan kumaa kooturan skim diti. Laang kopogirotankuasa’an nopo powonsoiyon miampai pointunud miampai manahak ponudukan, pason om kopoingatan kumaa mongingindapu’,” ka disio.
Id timpu miagal, Armizan pinoposorou nogi’ mongingindapu’ mooi do popodokot dodokot (label) kiwotik buragang (merah jambu) montok babarang di pitamangan id siriba’ SHMMP.
Pinosotol disio, laang okodou onuon kumaa nombo-nombo boogian i amu’ kapananud undang-undang id siriba’ Akta Kapanamangan Gatang om Antipencatutan (AKHAP) 2011, kaampai danda bobos akawas gisom RM500,000 montok komponi om RM100,000 montok minsosongulun.
Suai mantad kopoindalanan SHMMP, KPDN nga’ pinopointutun nogi’ pipiro inggisaman kopihondot Deepavali 2025 kaampai Ababayan Kapadagangan Rahmah MADANI (PJRM) om Ababayan ‘Servis Ihsan MADANI @ Petronas AutoExpert’ (SIM@PAX) montok monguhup rayat mongulud kos balanja masi.
Armizan pinoposotol nogi’, kopoindalanan Bajet 2026 kotilombus kopoinggirot karaja’ kosimbanon subsidi pobuntukon id siriba’ pomorintaan koporintaan MADANI.
Ka disio, ponginsonongan maya’ Ponguhupan Tunai Rahmah (STR) om Ponguhupan Asas Rahmah (SARA) kapatantu’ ponguhupan koporintaan korikot mitilombus kumaa tinimungan porikotan kaampai B40, M40 osiriba’, tulun nolohing om milang-bilang (bujang).
“Mintonod wulan Koiso’ 2026, oinsanan mamaramit STR nga’ karamit SARA tikid wulan kiginumu’ RM100 sombulan toi RM1,200 sontoun.
“Montok mamaramit id siriba’ ababayan e-Kasih, rontob SARA pinoingkawas kuminaa RM200 sombulan toi RM2,400 sontoun, naamot mamaramit ‘kategori’ bujang karamit RM50 sombulan,” ka disio.
Armizan minokianu nogi’ tulun ginumuan papatahak nunu-nunu ruputan kopohompit gatang om pangaba’ babarang maya’ WhatsApp KPDN (019-848 8000), piromutan 1-800-886-800, e-aduan@kpdn.gov.my toi aplikasi asanang papawaliu Ez ADU KPDN.
“Koporintaan tumopot do tumilombus papatantu’ kasasanangan rayat miampai popiadang koponsolon moomougno om mongindapu, suai ko’ monilombus ababayan MADANI montok pomogunon di lobi kotunda’ om kiginoris ogirot,” ka disio pinopointalang.
