KOTA KINABALU: Konsulat Jeneral Republik Rakyat China id Kota Kinabalu minogolimo totondos do kaka om Lansanon Akawas (Kedutaan Besar) China id Malaysia pinapalabus ‘kopoingatan okodou’ kumaa koporintaan Sabah kohondot kobolingkahangan pangaba’ waig.
Id iso’ kointalangan doid laman Facebook dau di tadau baino’, Konsulat Jeneral China pinoposotol do totondos i nokotonu’ id media sosial dilo’ nopo nga’ kointalangan pinudali’ (disinformation).
“Lansanon Akawas China id Malaysia om Konsulat Jeneral China id Kota Kinabalu amu’ insan palabus nunu-nunu ‘kopoingatan’ toi ‘kopongundoronokan’ kumaa koporintaan Pogun Sabah, Dewan Bandaraya Kota Kinabalu (DBKK) toi nombo-nombo boogian kikuasa’ nokoiyonon kohondot kobolingkahangan pangaba’ waig.
“Yahai nga’ amu’ insan karait nunu-nunu ‘pason pamanahan (travel advisory)’ miagal di pinotondos,” ka disio.
Konsulat Jeneral dilo’ pinoposotol, bohogian disio tumilombus momoguno sunduan piombolutan nogi’ piuhupan di kapanahak koundaran id pialatan China om Malaysia, kaampai monginggirot piromutan ‘praktikal’ id pialatan China om Sabah id kaganaan ponombuluyan, pidagangan nogi’ koubasanan.
“Tumilombus yahai papasanang pialanan rayat nogi’ piuhupan nayatan nokoiyonon id pialatan goduduo pomogunon,” ka do kointalangan dilo’.
Id timpu miagal, Konsulat Jeneral China minokianu media nokoiyonon do poporuput tumanud kointalangan nogi’ papamanau tonggungan kohunung id kopoinggirotan piromutan piombolutan misulak, suai ko’ mongilag kapatayadan kointalangan amu’ otopot i kopomurilong tulun ginumuan.
