Dr. Joachim (kotolu, wanan) minamaramit tandamato mantad di Ponorikohon PAM Raan Sabah, Ar. Daniel Koh.
KOTA KINABALU: Kosimbanon Sabah kumaa hab ikonomi kitopong pomogunan om koburuon kakadayan (bandar) pintar poindalanon mimpau do angkabon Sabah Maju Jaya (SMJ), i poposotol kaadangon koburuon maya’ inovasi digital, kopomogompian sandad posorili’ om koburuon modal insan, ka di Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Ka disio, angkabon dilo’ kopokito imanon timpu anaru koporintaan pogun maso-maso montok papatantu’ Sabah kosili pogun di osompuru, otoronong, otunda’ om komogot.
Minoboros isio, angkabon SMJ nga’ kopiongoi nogi’ di ababayan koburuon pomogunon id siriba’ Malaysia Madani om ‘Wawasan Kemakmuran Bersama 2030’, mimpai moningkanan kopoingkawasan intodonon pogun, ponondulian nogi’ kapagarasan ikonomi, om koburuon tulun.
“Koporintaan maso-maso alaid no momorikot montok poposili Sabah soginan hab ikonomi kitopong pomogunan om pogun kakadayan pintar. Iti kopiongoi di angkbaon SMJ montok monuridong songinan pogun om mogigiyon di osompuru, otoronong, otunda’ om komogot,” ka disio ontok minanahak boboroson id kinopoimaganan Borneo Architecture Festival (BAF) 2025 id The Magellan Sutera Resort do hiti, di baino’.
Dr. Joachim minoboros, inggisaman koporintaan pogun popoburu’ kakadayan pintar id pipiro kinoiyonon kosudong id Sabah poindalanon maya’ Palan Strategik Koporintaan Digital, i kituduan papaharo ekosistem ikonomi digital montok koundaran mitilombus kumaa rayat.
Ka disio, inggisaman dilo’ monokodung lugu’ kotolu angkabon SMJ, ilo’ nopo nga’ koburuon piromutan kogogonopan om pomogompian otomou, miampai moningkanan kumaa ponuridongan om ponginsonongan kogogonpan tindal, rahat, tawan om piromutan.
“Koburuon kakadayan pintar diti nga’ kituduan nogi’ montok popodigital surupukaraja’ koporintaan, mongingkawas koromuton om kaadangon mooi do oinsanan mogigiyon karamit kogogonopan infrastruktur di posodia’on,” ka disio pinopointalang.
Ka disio kawagu, ponginsomokan koporintaan pogun kohonot koburuon kakadayan pintar okon ko’ popointutun nopo tiknologi doun kaawagu, nga poposotol nogi’ do kogiroton om kapatanggayan mooi tikid koburuon kapanahak koundaran kumaa oinsanan mogigiyon.
Minoboros isio, uhu BAF toun diti, “Rewire // Rewild: Transforming Cities // Back to Nature” kopokito piadangan id pialatan komogoton tiknologi om ponondulian gompi’ sandad posorili’. Konsep “Rewire” sumuku’ kumaa kosimbanon pomusarahan kumaa kakadayan pintar om gaya pamamasi mimpau tiknologi, naamot “Rewild” poposotol pisarabakan seni wonsoi miampai sandad posorili’ maya’ pomowonsoi ‘biophilic’ om ‘biomimikri’.
Dr. Joachim nga’ pinoposorou nogi’ do kopoindalanan ponginwoguan om ‘urbaninasi’ di aparagat id Sabah kopongumpadan kointutunan koubasanan nogi’ tungkusan sandad pogun nung amu’ no soibahan do poinpusorou.
“Id kopomogusaan komogoton om inovasi, nuru’ tokou nogi’ papatantu’ tungkusan koubasanan kotilombus ogompi’ om oumoligan. Mositi’ tokou posuni sunduan poinsanganu om mamagatang kinolumison pomogunan Borneo id iyon-iyonon tokou diti,” ka disio pinoposotol.
Nunsub nogi’ disio tongo’ momomonsoi katatapan om pakakaraja’ koporintaan do mamarati waya’ timpu anaru tikid katatapan koburuon kumaa mogigiyon om sandad posorili’.
Dr. Joachim nga’ minongunsikou nogi’ kumaa Kotinanan Arkitek Malaysia (PAM) Raan Sabah mantad piniuhupan po’ompus miampai komontirian disio id kopoinggirotan koburuon, monginsikap koponuridongan om poointutun pomowonsoi di osonong.
Otumbayaan isio festival miagal BAF 2025 kaanu silihon koiyonon oponsol montok posuni piuhupan pialatan koporintaan, abaal, popomogot om mogigiyon ginumuan montok monigampot koburuon Sabah di lobi kopintar, otomou om kopotonggoi ngaawi’.
“Kalansanan ku maya’ pongonjuran festival diti, pialanan pomusarahan kotilombus kopongimbulai inovasi nogi’ monginggirot koburuon ikonomi songkoiyonon,” ka disio.
Nokotindapou nogi’, Kumoduo Monunurat Pointatap Komontirian Koporintaan Koiyonon om Pomuwalaian, TPr Stanley Chong; Luguan Potunud DBKK Datuk Sr. Lifred Wong; Timbang Presiden PAM; Ponorikohon Manganganjur BAF 2025, Ar Sharon M Amin om Ponorikohon of PAM Raan Sarawak, Ar Noraini Noradden.
