Hajiji miampai pipiro tutumanud konvensyen.
PENAMPANG: Boyoon Montiri Sabah, Datuk Seri Haji Hajiji Haji Noor minanahak pongiingilaan do Lintuhun Undangan Pogun (DUN) Sabah unggaron do wulan tiso’.
Ilo’ montok manahak kosiwatan kumaa Pomilian Agayo Pogun (PRN) pohoroon lobi kosopung ko’ mantad tadau opupusan penggal maso-maso do wulan Kohopod om Iso’ diti.
Minoboros isio, pongunggaran DUN nuru’ powonsoiyon pogulu 11tw Kohopod om Iso’ tu’ penggal opupusan miampai ‘otomatik’ do tadau dilo’.
“Aiso’ sumpili’ tokou sabab timpu Lintuhun ounggar sondiri’ wulan Kohopod om Iso’. Mantad dilo’, mositi’ pohoroon pogulu dilo’,” ka disio soira’ rinubaan katalib pinomupusan Konvensyen Mahasiswa Sabah 2025 id Lintuhun Koisaan Koubasanan KadazanDusun (KDCA), do hiti di konihab.
Pinosotol nogi’ disio do PRN Sabah ko-17 oponsol montok papatantu’ koburuon pogun koindalan oturundus id siriba’ pomorintaan Gabungan Rakyat Sabah (GRS) nogi’ monimporon kaadangon pulitik.
Daamot dilo’, i Hajiji minokianu rayat kosuul no 970,000 mongungundi’ omulok do momonsoi sompili’ di kohunung id PRN Sabah ko-17 i komoyon disio do oponsol montok papatantu’ kotilombuson koburuon id siriba’ pomorintaan GRS.
Ka di Hajiji, timpu dumontol Sabah poingiliu id longon sukod wagu om yolo’ pinokianu amu’ paparaarama’ kosiwatan montok momonsoi sumpili’ di kohunung id pomilian agayo obontol.
“Wonsoiyo’ no sumpili’ bobos osonong, i kajamin kotilombuson koburuon, kaadangon pulitik om kasasanangan rayat.
“PRN diti baino’ nopo nga’ kosiwatan bobos osonong montok momili’ koporintaan di agaras, lolobi no koporintaan i buruanon parti nokoiyonon. Kada’ tokou hulito’ kinosilapan laid gisom nohimpogongan koburuon pogun,” ka disio.
