Hajiji suminasi’ pinialanan dokumen pibatosan piuhupan id pialatan Sawit Pam Oil Industrial Cluster om Jetama.
KOTA KINABALU: Boyoon Montiri (KM), Datuk Seri Haji Hajiji Haji Noor di tadau baino’ suminasi’ ramai suminain Pibatosan Piuhupan id pialatan Sawit Palm Oil Industrial Cluster Sdn. Bhd. (SPOIC), tanak komponi Tinimungan Sawit Kinabalu, miampai Jetama Sdn. Bhd. (JSB) montok popoburu’ Loji Penyahgaraman Waig kikapasiti duo riong liter sangadau (2MLD) id Sawit Kinabalu Sandakan Industrial Park (SK SIP).
Ababayan i nakapanau id Longkod Upis Tinimungan Sawit Kinabalu, Menara Kinabalu dilo’ sinasi’ nogi’ di Monunurat Koporintaan Pogun, Datuk Seri Sr. Haji Safar Untong om Kumoduo Ponorikohon Sawit Kinabalu, Datuk Rubin Balang.
Pibatosan dilo’ sinoinan di Potunud Agayo Tinimungan po nogi’ Luguan Upisor Eksekutif (CEO) Tinimungan Sawit Kinabalu, Datuk Victor Ationg om Ponorikohon Jetama, Datuk Yusof Mannan. Naamot dilo’, Luguan Upisor Eksekutif Jetara, Datuk Ahmad Naim Uddang, nogi’ Kumoduo CEO Tinimungan Sawit Kinabalu, Datin Stella Ambrose, sabaagi sasi’ komponi.
Piuhupan kohunung diti koponginggirot tonggungan goduduo komponi kopohompit koporintaan (GLC) id kopoburuan kogogonopan pomorunan misompuru id Sandakan.
SK SIP i kiginayo 1,010 ekar tinuridong sabaagi taman pomorunan noinggonopan do kogogonopan montok monginggumu’ ikonomi pogun, pongimbayat kopoopuan kohunung, nogi’ papasarok koburuon pomorunan ‘hiliran’ id Sabah.
Montok momogonop kopomogunaan pangaba’ waig di osonong, loji ‘nyahgaram’ (pongiduantoosin) momoguno tiknologi ‘Reverse Osmosis’ (RO) maan turidongo’ montok mompurusis waig rahat kumaa waig nousap gred pomorunan.
Loji dilo’ kosili komponen agayo id koponokodungan kosunion pomorunan om mogigiyon nokoiyonon.
Id kointalangan goduo, i Victor minoboros, projik diti kosili posunduran kumaa kopotundaan sosioikonomi Sabah miampai mongukab kosiwatan pakarjaaan, mongunsub kosunion pomorunan hiliran, suai ko’ kapatantu’ pangaba’ waig po’ompus montok koiyonon pomorunan.
“Piuluhan diti kopokito tonggungan po’ompus duo GLC id koponokodungan ababayan koburuon pogun nogi’ mongingkawas kotumbayaan papaapu’ id Sabah,” ka disio.
