KOTA KINABALU: Pulis Sabah minanahan songulun kusai nokoiyonon kiumur 61 toun tu’ kotumbayaan minogundoronok songulun abaal patologi Walai Pongubatan Queen Elizabeth I, Kota Kinabalu kohondot kes kinapataion Zara Qairina Mahathir.
Pesuruhjaya Pulis Sabah, Datuk Jauteh Dikun minoboros, kinapanahanan dilo’ winonsoi di jaam ko 7 kosuabon baino’ id luan Longkod Upis Pulis Watas (IPD) Semporna.
Ka disio, pinonorikan pinoindalan soira’ bohogian pulis nakaramit ruputan di ko 5tw Kosiam kohondot kointalangan kikoyuon kopogundoronokan pomusalaan i pinosoliwan minomoguno akaun Facebook “Amung Kamaruddin”.
“Kointalangan dilo’ kikoyuon kopogundoronokan kohondot di songulun abaal patologi Koupisan Forensik, Hospital Queen Elizabet I. Kes diti soriukon id siriba’ Seksyen 507 Kanun Keseksaan om Seksyen 233 Akta Komunikasi om Multimedia Malaysia 1998,” ka disio id kointalangan di tadau baino’.
Minoboros isio, nosusuhut pinomogombitan dilo’, pulis minagahou nogi’ songinan telefon piakil-akil pungaran ‘Redmi’ pasanganu di notondosan.
“Pinogintongan osopung nokoilo do i notondosan nopo nga’ sanganu akaun Facebook dilo’ i pinapalabus kointalangan kikoyuon mogundoronok,” ka disio pinopointalang.
Jauteh pinoposorou nogi’ tulun ginumuan mooi do momoguno media sosial miampai poinhunung om kitonggungan mooi do amu’ kopomidsala’ kotoronongon ginumuan nogi’ koponinong korosian mogigiyon.
“PDRM mintong poinwagat nunu-nunu koyuon kopomogunaan sala’ media sosial i kapanahub undang-undang. Laang okodou maan onuo’ kohondot nombo-nombo tulun i oilaan popowonsoi kasalaan dilo’,” ka disio pinoposotol.
