Tun Musa (kolimo, wanan) ruminamit tandamato mantad di Rusmadi.
KOTA KINABALU: Palan Koburuon Sabah Maju Jaya (SMJ) 1.0 nokoposurat naangayan 94 pihatus mantad sondikoton kolimpuunon kinopoindalnaan palan koburuon po’ompus toun 2024.
Luguan Mongungulud Sekretariat SMJ, Datuk (Datu) Rosmadi Datu Sulai minoboros naangayan dilo’ nokopokito inggisaman koporintaan pogun id solug di kohunung id kopogowitan koburuon aadang kumaa rayat kaampai no mantad sunduk ‘modal insan’.
“Nunu pia i angkabon tokou amu’ osigampot nung aiso’ no sokodung intodonon tulun di kitoilaan om aahak.
“Kohondot dilo’, koposotolan kumaa koburuon modal insan oponsol kopio montok papalantoi koburuon di aadang id pogun diti,” ka disio soira’ rinubaan media katalib kotombuluyan apantang kumaa di Molohingon Agayo Pogun, Tun Musa Aman di tadau Koiso’.
Kinotombuluyan dilo’ pinaharo montok pinapatahak ruputan naangayan SSMJ 2024 om minokianu ponontudukan mantad di Tun Musa montok papatantu’ waya’ koburuon di osonong aanu monilombus id sondikoton SMJ 2.0.
Tumanud ruputan SMJ 1.0, koporintaan pogun pinapabalanja’ RM848.26 riong po’ompus toun 2021-2024 kopuli do oinsanan Sikulasip Koporintaan Pogun Sabah.
Maya’ Bajet Pogun Sabah Toun 2025 nopo, koporintaan pogun pinopoobi’ RM485 riong montok popoburu’ inggisaman kopohompit kopoburuan modal insan nokoposili pabalanjaan koporintaan pogun nokosigampot RM1.33 bilion po’ompus timpu dilo’.
Sekreatariat Sabah Maju Jaya tinuridong di ko 5tw Kohopod 2020 id siriba’ Koupisan Surupukaraja’ Koporintaan Pogun Sabah (JPANS), naamot Palan Koburuon SMJ 1.0: 2021-2025 pinoimpuun miampai pohimagon di Boyoon Montiri Sabah di ko 29tw Kotolu 2021.
