Tun Musa (tanga’) miampai di Christina (kotolu, gibang) om tinonudan.
KOTA KINABALU: Pamaramaian Tadau Malaysia Nayatan Pogun Sabah Toun 2025 id Padang Merdeka do ko 16tw Kosiam diti pikikiro aramai kopio miampai mogisusuai ababayan koimbayat kaampai pokikitanan ‘bunga api’ sabaagi ababayan limunduk.
Montiri Ponombuluyan, Koubasanan om Sandad Posorili’ Sabah Datuk Seri Panglima Christina Liew minoboros, pamaramaian toun diti lobi poinhaahali’ miampai mogisusuai ababayan koimbayat di pinalan om pikikiro kopongimbayat korikotan kikiro 20,000 tombului kaampai mogigiyon nokoiyonon om tutumombului.
“Tikid toun pamaramaian Tadau Malaysia osuul kopio tu’ momuhondom kinoponuridongan Malaysia, i potuu id Semenanjung, Sarawak toi id Sabah, yati’ oinsanan mamaramai dilo’.
“Piandadan tokou ababayan i noponu’ mogiwotik-wotik miampai mogisusuai kaparagatan om pokikitanan koimbayat, naamot pokikitanan bunga api kosili ababayan limunduk pamaramaian,” ka disio kuminaa media katalib pinaharo kotombuluyan apantang kumaa di Molohingon Agayo Pogun, Tun Musa Aman id Istana Seri Kinabalu, di tadau Koduo.
Ka di Christina, kotombuluyan dilo’ kituduan mangalap di Tun Musa montok popoimagon pamaramaian Tadau Malaysia om isio po nogi’ Ponorikohon Puruankuasa’ Induk pamaramaian dilo’ minokianu tulun ginumuan rumikot mooi pamaramai kapamaramaian dilo’.
“Montok mongilo sondiri’ tongo’ kaparagatan koimbayat i pinosodia’, tulun ginumuan alapon tumingan id Padang Merdeka do ko 16tw Kosiam.
“Kalansanan ku mooi do pogun Sabah kotilombus oulud om otoronong miampai mogigiyon di orukut tinaru,” ka disio pinopointalang.
Nokotindapou nogi’ i Monunurat Pointatap Komontirian Ponombuluyan, Koubasanan om Sandad Posorili’ Datuk Josie Lai.
