Dr. Joachim miampai momuruan akawas PBS di suai pinapalahat do ‘Bersatu!’ id kinopoimaganan Mitingan Agayo Tounan Tolu Bohogian dilo’.
RANAU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam pinoposotol do parti dilo’ tumilombus monginggirot piuhupan miampai tongo’ parti nokoiyonon id Gabungan Rakyat Sabah (GRS) montok nopo monugat tongo’ kopotutan pogun diti.
Minoboros isio, laang dilo’ kopiongoi di ‘model’ pulitik id Sarawak hinombo tongo’ parti ‘lokal’ nakalantoi minisompuru id sahau iso’ piomungan ogirot, ilo’ nopo nga’ Gabungan Parti Sarawak (GPS).
“Sasaru’ tokou korongou netizen moboros do Sabah nuru’ momit Sarawak. Nga’ yolo’ nogi’ do otopot nopo kapaampai do Gabungan Parti Sarawak. Iti no i umbalan tokou popowonsoi id Sabah. Miamung tokou di parti lokal montok monugat tongo’ kopotutan Sabah sundung pia haro parti i amu’ nokopouhup timpohon,” ka disio.
Dr. Joachim (tanga’) guminambar miampai dilo suai pogulu minonimpuun Mitingan Bohogian PBS Kundasang.
Dr. Joachim minoboros dilo’ ontok pinopoimagon Mitingan Agayo Tounan tolu bohogian PBS ilo’ nopo nga’ Kundasang (N.36), Karanaan (N.37) om Paginatan (N.38) id Lintuhun Tokong Cina Ranau, do hiti, konihab (30tw Kowalu’).
Pinosotol disio, id timpu limo toun potohuri diti PBS monongkounsikou kopio tu’ nakaanu miniuhup miampai tongo’ parti susai i miilang tuduan, hontolon om sondikoton id kopoburuan kaadangon nogi’ koponsolon watas Sabah.
Minongomi pomusarahan do PBS mamanau mimpoopori, Dr. Joachim pinoposotol parti dilo’ do noondo momili’ montok miuhup miampai ogirot id GRS montok no mongilag pibabakan pulitik.
Dr. Joachim suminain banner kopihondot Ramai Kinopoimaganan Mitingan PBS Tolu Bohogian dilo’ om sinasi’ dilo puru PBS Kundasang.
“Oo, PBS di pogulu nokoumbal minomorinta’ sosondiri. Nga’ koyuon do noondo sopisuai kopio. PBS miuhup miampai di oinsanan parti lokal id GRS. Lobi kosonong do misompuru tokou ko’ mantad mogiurias. Pibabakan kopoimamang om kapanahak nopo koundaran kumaa ponokisahap,” ka disio.
Daamot dilo’, pinopolombus nogi’ isio pongunsikohan om panangkabayahan kumaa puruankuasa’ manganganjur miuhup nogi’ kototolu bohogian poinhompit i papaatod mongobi’ kumaa kongres PBS do obontol.
Ka disio, GRS kikosiwatan sumili piomungan ‘dominan’ id Sabah om nung onuan mandat insan po, kaanu ilo’ mongingkawas asil pogun nogi’ monginggirot koburuon om kasasanangan rayat.
Dr. Joachim (gibang) minamaramit skrol ‘Ikrar PBS’ mantad di Timbang Luguan Komulakan II PBS Kundasang, Muhammad Adli Somihin id ababayan dilo’.
Dr. Joachim minongunsikou nogi’ di tambalut mantad parti id GRS do tumindapou sabaagi mio’ontong wookon nopo nga’ i Monguhup Montiri kumaa Boyoon Montiri i po nogi’ Luguan Parti Solidariti Tanah Airku (StarSabah) DUN Paginatan, Datuk Abidin Madingkir; Luguan Bohogian Gagasan Rakyat Paginatan, Datuk Amisah Yasin om Luguan Bohogian Gagasan Rakyat Kundasang, Johari @ Joe Haji Suhaimin.
Nokotindapou nogi’ i tongo’ Kumoduo Presiden, Datuk Seri Jahid Jahim i po nogi’ Montiri Koburuon Labus Kakadayan; Datuk Dr. Yee Moh Chai; Monunurat agayo i po nogi’ Monguhup Montiri Kousinan, Datuk Julita Majungki; tongo’ Timbang Presiden PBS, Datuk Hendrus Anding; Datuk Dr. Christoper Mandut po nogi’ Luguan Komulakan PBS, Datuk Johnny Mositun; Datuk Arthur Sen po nogi’ Luguan Bohogian PBS Paginatan; Datuk Bernard Dalinting po nogi’ Luguan Bohogian PBS Karanaan; Monobubut Agayo Datuk Lu Kim Yen; Luguan Tinimungan Koonduan i nobian di Kumoduo Luguan Koonduan, Rosnah Ullap; oinsanan Puru Kounsol Awakas (AMT), Ponorikohon Popoindalan Ababayan do mogiuhup, i austin Thomas (PBS Paginatan), Yubidi Gumpoyo (PBS Kundasang) om Marinus Danin (PBS Karanaan), Exco Koonduan om Exco Komulakan nogi’ tongo’ luguan bohogian.
