Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minokianu rayat tumilombus posuni sunduan mongupus pogun (patriotisme), momogompi’ pisompuruan om monimporon piuludan id nayatan mogisuaian tinaru nogi’ ugama’ id pogun diti.
Id pason disio kopihondot pamaramaian Tadau Sabah om Tadau Kabansaan 2025, Boyoon Montiri minoboros, pamaramaian goduduo diti kapanahak kosiwatan montok moniib susuyan kahandaman, moginggirot ginawo om poluhub kopurimanan mongupus kumaa pogun.
“Tadau 31tw Kowalu kiharo rati agayo kumaa susuyan kahandaman Sabah. Ontok tadau diti, mamaramai tokou Tadau Kabansaan om Tadau Sabah, duo karamaian i aanu silihon posunduran koponompuruan kumaa koinsanai rayat Malaysia i mogisusuai natandon.
“Otopot nopo, tadau kisusuyan diti okon ko’ timpu nopo montok sorohon om ramaion, nga nogi’ timpu dati’ do otootopot mamagatang kinolubukan pinopoburu’ kinomordikaan pomogunan i minggisom montok no kinosimbayanan,” ka disio id kointalangan konihab.
Hajiji minoboros, uhu Tadau Kabansaan 2025, “Malaysia Madani: Rakyat Disantuni” om uhu Tadau Sabah 2025 “Untukmu Sabah Tanah Airku” kopokito pason oinsanan i mimpau prinsip Madani om Palan Koburuon Sondikoton Sabah maju Jaya.
“Kanouo tokou no tumilombus muringat di nunu-nunu koyuon poinsala’ i kopomiraag piuludan om pisompuruan gisom koowit kumaa pogiuriasan,” ka disio.
