KOTA KINABALU: I Molohingon Pogun Sabah, Tun (Dr.) Musa Haji Aman minokianu rayat pogun diti do tumilombus momusus pisompuruan om magada’ nunu-nunu inggisaman bohogian aiso’ tinonggungan i mumbal papasasad pogiraraatan maya’ totondos om pongudutan, kosuul no id media sosial.
Id pason disio kopihondot Pamaramaian Tadau Kabansaan om Tadau Sabah 2025, pinosotol disio do kotoronongon, piuludan nogi’ sunduan misompuru ogirot nopo nga’ kouhupan bobos agayo rayat Sabah kumaa kinalantaion Malaysia.
“Kopotongob kopio soira’ pogiraraatan mumu’-gumu’ kotonu’ id media sosial, hinombo do kisuang sasaru’ onuon mantad labus ‘konteks’ om pogugulian popoilang gisom koponinong kotongoban id nayatan mogigiyon miampai aiso’ kopohimogonan mantad bohogian kikuasa’ toi intodonon di otopot,” ka disio.
Pinoposorou isio do sundung pomogunan noondo diti lumaang kumaa timpu tiknologi kointalangan ‘canggih’ om komilaan winonsoi, rayat pointatap kiharo tonggungan montok papatantu’ kointalangan di poilangan nopo nga’ kohunung om otopot.
Tumanud di Tun Musa, Sabah solinaid diti nosili ombitanan osonong id sunduk pisompuruan doid kopogisusuaian mantad no do kinolumison tinaru om koubasanan di pasanganu.
“Piuludan tokou nopo nga’ ginaras tokou, om amu’ tokou kaanu popologos dilo’ do atagak di koponuhuan do mongurias mogigiyon,” ka disio pinoposotol.
Pinokianu nogi’ disio rayat Sabah do tumilombus miuhup monimbuat pogun om pomogunon kumaa rontob di lobi kasawat, suai ko’ mongigit kopurimanan mamantang sompipi’ tiso’ om tiso’ amu’ momuntuk tinaru, ugama’ toi pogun nantadon.
Kopihondot po nogi dilo’, Tun Musa pinoposotol koponsolon popironit pisuayan koburuon id pialatan Sabah om tongo’ pogun ngaawi’ suai maya’ do katatapan kosudong nogi’ inggisaman sosioikonomi di kiwaya’.
“Nuru’ tokou minggisom mongingkawas sinonong koposion rayat id Sabah. Orohian oku nogi’ poposorou surupukaraja’ koporintaan pogun di tonggungan diolo’ montok papatantu’ oinsanan projik om ababayan di pinalan poindalanon osisikap miampai aiso’ kohimpogongan ‘birokrasi’ di aiso’ gorong,” ka disio.
Minoboros isio, tingkananon nopo nga’ nuru’ do toririmo patahakon kumaa koponsolon rayat, kopiongoi di tuduan koburuon pogun om pomogunon.
Tun Musa nga’ pinoposotol nogi’ do kaadangon pulitik Sabah oponsol kopio montok mongimbayat kopoopuan mitilombus labus nogi’ bakat wagu, i kapasarok kosunion ikonomi pogun.
Ka disio, haal dilo’ nga’ koowit lobi kogumu’ kosiwatan om komogoton kumaa rayat, kopiongoi di angkab montok poposili Sabah songinan pogun di otunda’ om asanang.
“Ontok Tadau Kabansaan om Tadau Sabah 2025 diti, kanou tokou no monginwagu angkab montok tumilombus misompuru om miuhyup montok kalantaion po’ompus Sabah om Malaysia,” ka disio.
Minaganu nogi’ isio kosiwatan minamason Kounsikahan Mamaramai Tadau Kabansaan om Tadau Sabah 2025 ukmaa oinsanna rayat Malaysia, kosuul no id pogun diti.
