Peto (kaapat, gibang) i tinanud di Leonard (kolimo, wanan) pinapatahak tandamato kuminaa di Tun Musa.
KOTA KINABALU: Montok kumoinsan nogi’, Pamaramaian Tadau Sabah 2025 pinopointanga’ Gaa’ Tokoh Pejuang Kemerdekaan Sabah.
Monguhup Montiri Pomutanaman, Ponginsadaan om Pomorunan Akanon Sabah (MAFFI), Datuk Peto Galim minoborsos pamaga’an dilo’ poindalanon di Molohingon Agayo Pogun Sabah, Tun Musa Aman id Padang Merdeka mimpuun jaam ko 7 otuong, do ko 31tw Kowalu’ diti.
“Amu’ tokou momolihu di pinopoburu’ ngaawi’ susuyan kahandaman i minogowit dati’ mantad di pogulu gisom no do babaino’.
“Mantad dilo’, iso’ mantad ponuang di haro nopo nga’ mamagatang tokou om momolohou di pinopoburu’ dati’ i nokopogulu om pikikiro doti’ do paganakan diolo’ nung okon yolo’ ko’ id pogun Sabah.
“Iti nopo nga’ pomusarahan dati’ om oponsol kopio montok dati’ do momonsoi do toun diti. Di toun nakatalib, amu’ tokou doti’ nokosiwat, nga’ toun diti tantu’ do powonsoiyon om okito do i Tun nga’ kosokodung tomod om ounsikou di atag diti’,” ka disio.
Kohondot dilo’, pinointalang disio, tulun ginumuan alapon do tumindapou potilombus dino mamaramai Tadau Sabah di kumointolu dilo’ miampai uhu ‘Untukmu Sabah Tanah Airku’.
“Tantu’ no do ababayan Pamaramaian Tadau Sabah 2025 diti atalang, oponsol kopio om pinatantu’ tokou pipiro katatapan oponsol.
“I kumoiso’, pokionuon tokou tongo’ lalansanon nokoiyonon rumikot poinponu’ id ababayan diti om koduo, pokionuon tokou nogi’ tongo’ mogigiyon rayat Sabah id dodoros do Kakadayan Agayo Kota Kinabalu rumikot ogumu’.
“Iti nopo nga’ iso’ pamaramaian di kumointolu winonsoi dati’ id Sabah, Tadau Sabah. Kanou tokou no rumikot oinsanan miampai sunduan ‘patriotik’ mooi kaanu tokou tumimung id sunduang pogi’isaan, sunduan Malaysia Madani montok mogowit Sabah diti lobi koburu’,” ka disio kumaa media katalib pinapaharo kotombuluyan apantang kumaa di Tun Musa id Istana Seri Kinabalu, di tadau baino’.
Peto i tinanud di Monunurat Pointatap MAFFI, Datuk Leonard Stephen Poyong minoboros, kotombuluyan dilo’ kituduan montok papatahak kapagalapan pinotomod suai ko’ minanahak kopointalangan toniba’ karait ababayan ngaawi’ ontok pamaramaian dilo komoyon.
