Dr. Jamili (koduo, giban) minamaramit tandamato mantad Presiden SHAREDA Datuk Johnny Wong Chen Yee.
KOTA KINABALU: Koporintaan pogun pinoposotol tonggungan montok monginggirot sokodung, popoindalan ‘reformasi’ (kosimbanon) om popoinggayo piuhupan miampai koinsanai mongingigit tonggungan pomorunan harata’tana’ montok papatantu’ tikid rayat pogun diti kaanu sumanganu walai di osimbayan, oumolig om kibantug.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, koporintaan karati kaantaban maso-maso i kopomohimpogong siktor harata’tana’, lolobi no kinoingkawason kos babarang pomonsoi, kuasa boli i nokoinsiriba’, kinodihuntunan harata’tana’ apagon nogi’ kosusaon kapambayaran montok momomoli walai kumoiso’.
“Haal ngaawi’ diti nokoowit rontob kopongonuan unit orulan, lolobi id watas kakadayan. Ogumu’ id nayatan B40 om M40 kakal potoguang kosusaon mamagampot imanon sumanganu walai sondiri,” ka disio.
Dr. Joachim minoboros, koporintaan pogun maya’ Komontirian Koporintaan Koiyonon om Pomuwalaian (KKTP) minamalan karalano’ timpu oniba’ om anaru montok monoibau kaantaban dilo’.
Wookon inggisaman agayo nopo monilombus Ababayan Residensi Rakyat (PRR) maya’ piuhupan koporintaan-swasta montok poposodia’ walai ogoosan sumanganu di osonong nogi’ oinggonopan do kogogonopan mogigiyon, koiyonon otomou om ‘infrastruktur’ doun kaawagu.
“Sabaagi poiradan, unit kigatang RM300,000 anau pouyuhon kumaa suang walai i kosudong id gatang do RM60,000 no. Model miagal diti kosili imanon sumanganu walai lobi kosomok kumaa kotulukon,” ka disio ontok pinopoimagon SHAREDA PropEX 2025 ki’uhu ‘My Perfect Home’ id Longkod Konvensyen Sompomogunan Sabah (SICC) do hiti di tadau baino’. Teks boboroson disio binasa’ di Monunurat Pointatap Komontirian, Datuk Dr. Jamili Nais.
Dr. Joachim minoboros, suai dilo’, koporintaan miuhup miampai kotinanan kousinan montok mongukab skim koponguhupan ‘inovatif’ miagal siwa’-boli, pakej ‘gadai janji’ kitimpu nogi’ jominan ‘kredit’ pomuwalaian kosuul no montok momomoli walai kumoiso’.
Pinosotol po nogi’ disio kogunaan ababayan Sabah-MM2H (S-MM2H) sabaagi posunduran pidagangan harata’tana’, kosuul no id kopongonuan noopod unit tiiyonon mitimpak akawas kigatang RM600,000 om id kawas.
“Laang diti okon nopo ko’ mongunsub pidagangan harata’tana’, nga monginggirot siktor ponombuluyan nogi’ kaparagatan ikonomi poinhompit,” ka disio.
Minoboros isio, karalano’ timpu anaru koporintaan moningkanan kumaa segmen B40 om M40, miampai poposuul koponginwoguan kakadayan, koburuon opidot mimpau ‘transit’, nogi’ kapanahakan ‘insentif’ kumaa monunuridong montok mongingkawas ginumu’ unit ogoosan sumanganu.
“Sondikoton okon nopo ko’ monuridong walai, nga monuridong iyon-iyonon, monuridong kalansanan om timpu dumontol di lobi kosonong montok rayat Sabah,” ka disio.
Kohondot dilo’, nunsub disio monunuridong om mongingigit tonggungan mooi do kobulun, ‘adaptif’ om ‘inklusif’ id karalanon koburuon.
“Ralan kumaa ‘My Perfect Home’ mositi’ turidongon mimpau piuhupan, ‘inovasi’ om kolisihan. Ababayan koburuon pomuwalaian id Sabah mositi’ moningkanan rayat, kotolibamban do kountungan nopo tomod,” ka disio.
Id timpu miagal, Dr. Joachim minongunsikou nogi’ kumaa SHAREDA (Koisaan Popomogot Pomuwalaian om Harata’tana’ Sabah) mantad pinongonjuran PropEX ko-47 i komoyon disio do koiyonon oponsol montok monginggirot piuhupan, inovasi om kosunion siktor harata’tana’ id pogun diti.
“Tonggungan SHAREDA kohondot kinalantaion om tonggungan kumaa rayat Sabah gatangon kopio. Kalansanan PropEX 2025 kopongukab ralan kumaa ‘landskap’ harata’tana’ di lobi inklusif, kiginaras asangal om ‘dinamik’,” ka disio.
