Christable Heng Fook Yun (kotolu, gibang) minamaramit surat kopouyuhan Sikulasip Gaa’ Cemerlang TYT Sabah mantad di Tun Musa.
KOTA KINABALU: Susumikul bobos osonong Setifikit Akawas Balajaran Malaysia (STPM) 2024 nayatan kabansaan, Daniel Hakimi Roland, 19, nopo nga’ wookon di onom susumikul i minamaramit Sikulasip Tuan Yang Terutama Yang di-Pertua Negeri Sabah Toun 2025.
Susumikul osonong naangayan aliran Sains Sosial dilo’ nokoposurat naangayan bobos akawas Pulampai Gatang Gred Kumulatif (PNGK) 4.00 id STPM id Kolej Tingkatan 6 Sikul Mananga’ Kota Klias, Beaufort om minomili’ do mongoput sinikulan id univositi nokoiyonon.
Limo susumikul suai kaampai susumikul Kolej Matrikulasi Selangor, Nur Batrisya Sumar, 19, mantad Telipok, i mongopus balajaran id nayatan Bachelor of Accounting (Hons) id Durham University, United Kingdom om susumikul mantad Tenom, Christabel Heng Fook Yun, 18, i mongoput sinikulan id kaganaan pongubatan doid Trinity College Dublin, Ireland.
Sikulasip dilo’ naramit nogi’ di susumikul mantad Papar, Elena Roland Banus, 21, i mongoput balajaran id nayatan Bachelor of Engineering (Hons) id The University of Queensland, Australia om susumikul mantad Putatan, Aisha Azizul, 19, nopo nga’ mongoput balajaran kumaa nayatan BA Human, Social and Political id University of Cambridge, England.
Susumikul i ki’imanon sumili Akauntan, Nurul Aisyah Awang Basri, 19, mantad Keningau nga’ gina’an nogi’ do sikulasip TYT om mongoput balajaran id kursus Advances Accounting with Placement id Queen’s University, United Kingdom.
Ababayan kinapatahakan surat kopouyuhan sikulasip nabantug dilo’ pinoindalan di Molohingon Agayo Pogun Sabah, Tun Musa Aman id Lintuhun Kunjungan Istana Seri Kinabalu, di baino’.
Nokotindapou nogi’, Luguan Potunud Surupukaraja’ Koporintaan Pogun Datuk Zainudin Aman miampai Puru Komitikuasa’ Sikulasip Koporintaan Pogun Sabah.
Kinapaharaan Sikulasip Tuan Yang Terutama Yang di-Pertua Negeri Sabah pinolulus maya’ Mitingan Kabinet di ko 30tw Koiso’ 1982. Sikulasip diti patahakon kumaa susumikul i kaanu kootusan bobos osonong id poporisaan STPM.
Id Mitingan Kabinet di ko 7tw Kowalu’ 1991, kosudongan akademik pouyuhan sikulasip dilo’ pinopotonggoi kumaa nayatan Asasi/ Matrikulasi/ A-Level id nayatan susumikul mamasok om okon mamasok.
Om nogi’, kapamaga’an dilo’ nopo tumanud di merit naangayan kootusan poporisaan di ‘cemerlang’ om susumikul kaanu momili’ koiyonon pinsingilaan sompoopori id suang toi labus pogun.
