Jahid i minongobi’ di Boyoon Montiri, tinanud di Monguhup Montiri Ponombuluyan, Koubasanan om Sandad Posorili’ om ADUN Kiulu, Datuk Joniston Bangkuai, ontok minooi intong kaunter JoW.
TUARAN: Boyoon Montiri, Datuk Seri Haji Hajiji Haji Noor lumansan mooi do Ababayan Justice on Wheels (JoW) Koupisan Ponguhupan Guaman (JBG) aanu paraladon kumaa lobi kogumu’ koiyonon poonsokid mooi lobi kogumu’ rayat id Sabah kaanu piromutan kumaa surupukaraja’ ponguhupan guaman.
“Iti nopo nga’ haal oponsol kumaa kasasanangan rayat tu’ kapatantu’ ilo’ do sistem kaadangan tokou kikoyuon ‘inklusif’ (kopotonggoi ngaawi’) om asanang momoromut di oinsanan nayatan mogigiyon.
“Ababayan diti, i moningkanan do kapatahakan kaadangan miampai poinpuliosonong lolobi no kumaa diolo’ i poingiyon id watas labus kakadayan toi amu’ songkuro kinonosipon, nga’ kopiongoi nogi’ di angkab koporintaan pgoun do aiso’ songulun pia rayat i oiduanan id koonuan piromutan kumaa kaadangan,” ka disio id ababayan JoW i pinaharo doid Lintuhun Seri Sulaman do hiti di tadau baino’. Teks boboroson disio binasa’ di Montiri Koburuon Labus Kakadayan, Datuk Jahid Jahim.
Boyoon Montiri minoboros nogi’, ababayan diti kopokito tonggungan om tinopot koporintaan id koposuulan otnggungan JBG do mongobi’ kopotutan tinimungan amu’ songkuro kikokusupan id koonuan kaadangon di aadas.
“Mogisusuai koponginwoguan i ninggisaman montok popointutun surupukaraja’ ponguhupan guaman nogi’ papatayad toilaan om kopurimanan tulun ginumuan karait kogogonopan i pinosodia’ do koporintaan.
“Iti oponsol montok papatantu’ aiso’ isai i koindisan mantad pitorinaan koundangan di aadang sasabab nopo kobolingkahangan amu’ kosukupan om kinokurion toilaan karait kogogonopan i pinosodia’ do koporintaan pointonod 54 toun nakatalib,” ka disio.
Boyoon Montiri minoboros, kinoonuan songinan van pinotomod montok Sabah, ointutunan sabaagi van JoW Sabah, montok popoindalan ababayan diti i pinoimpuun doid Penampang di tulan Koiso’ 2024, nopo nga’ kointalangan tonggungan koporintaan MADANI kopiongoid i angkabon koporintaan pogun montok poposodia’ piromutan kumaa kaadangon montok tikid nayatan mogigiyon amu’ momuntuk do kinoiyonon.
Po’ompus toun 2024, JBG nokopoindalanan 28 ababayan id Sabah, Sarawak, Johor, Negeri Sembilan, Pahang, Perak, Kedah om Terengganu.
Toun nakatalib, ababayan JoW pinoindalan id limo watas id Sabah ilo’ nopo nga’ Pitas, Tongod, Papar, Sipitang om Paitan.
Toun diti, JoW tinimpuunan id Kampung Gas, Batu Sapi, Sandakan; Lintuhun Mogigiyon Tawau; om Kuut Syariah Lahad Datu di tulan Koduo, sinusuhut doid Dataran Bagandang, Beaufort di tulan Koturu’, pogulu pinapanau id Tuaran di tadau baino’.
