Dr. Joachim (tanga) pinapalahat do ‘Bersatu’ miampai dilo oinsanan nokotindapou id Pitimungan Agayo Toun-toun dilo’.
TELUPID: Koporintaan Gabungan Rakyat Sabah (GRS) kaanu mamajamin kaadanagon pulitik id pogun diti sabab ilo nopo nga’ piomungan walu’ parti nokoiyonon i moningkanan kumaa koburuon Sabah, ka di Kumoduo Boyoon Montiri II, Datuk Seri Dr. Joachim Gunsalam.
Minoboros isio, kaadangon pulitik dilo’ kosili posunduran kumaa kosunion ikonomi pogun pointonod GRS minonowoli kopomorintaan.
“GRS mositi’ tumilombus momorinta’ pogun diti montok no kotilombuson kumaa koinsawaton ikonomi do poinpuli,” ka disio.
Isio po nogi’ Ponowoli Presiden Parti Bersatu Sabah (PBS) minoboros dilo’ ontok pinopoimagon Pitimungan Agayo Toun-toun ko-40 PBS Bohogian Telupid id Lintuhun Tulun Ginumuan, Kampung Telupid, do hiti di konihab.
Dr. Joachim (gibang) pinopoinsawat bondira PBS om luminoyou ‘Bersatu Dalam PBS’ om sinasi’ di Jonnybone nogi’ ilo suai.
Dr. Joachim pinoposotol nogi’ do nombo-nombo mongingigit timpohon Lintuhun Undangan Pogun (DUN) i nalantoi pogulu diti tumilombus mongobi’ GRS id Pomilian Agayo Pogun ko-17 (PRN17).
Kohondot dilo’, nunsub disio oinsanan pakakaraja’ om puru PBS Telupid do miiso’ ginawo nogi’ manahak sokodung ouli’ kumaa Luguan Bohogian PBS Telupid po nogi’ ADUN Telupid, Datuk Jonnybone J. Kurum mooi do kotilombus momusus timpohon dilo’ id PRN obontol.
“Isio (Jonnybone) toririmo moboros id DUN om tumopot kumaraja’ montok kasasanangan rayat Telupid. Apatut kopio dati’ do papatantu’ kalantaion disio do insan po,” ka disio i po nogi’ Montiri Koporintaan Koiyonon om Pomuwalaian (KKTP).
Dr. Joachim minanangkabayahan po nogi’ kumaa Ponorikohon Manganganjur, Marcellus Jeffrey nogi’ nuludan puruankuasa’ PBS Bohogian Telupid mantad kinalantaion pinapaanjur pitimungan dilo’.
Pinapatahak nogi’ isio kopongunsikohan kumaa Monontuduk Agayo PBS, Datuk Seri Michael Asang i po nogi’ bagas ADUN Labuk om nokotindapou id ababayan dilo’.
“Nuru’ sorohon, DUN Telupid di pogulu nopo nga’ sombogian mantad DUN Labuk, om i Datuk Seri Michael Asang nokoumbal pinapapanau tonggungan agayo id koiyonon diti,” ka disio.
Dr. Joachim pinopoindalan gimik kinopoimaganan miampai minonuntung tagung om sinasi’ di Michael (kotolu, wanan) om i Jonnybone (koduo, gibang).
Nokotindapou nogi’ ADUN Labuk i po nogi’ Luguan Parti Gagasan Rakyat Sabah (Gagasan Rakyat), Datuk Samad Jamri om tongo’ mongobi’ mantad Parti Solidariti Tanah Airku (STAR) om Gagasaran Rakyat Bohogian Telupid.
Daamot dilo’, i Jonnybone pinopolombus kopongunsikohan kuminaa di Dr. Joachim mantad kinasagaan ruminapou id ramai dilo’ sundung do opidot timpu, om minonongkounsikou mantad kinopoobian pinotomod KKTP montok monginsonong linimput Kuut Tanak Mamasok Pogun (MAN) Watas Telupid, suai ko’ pipiro kinoponimbanan enakmen dilo’ i po nogi’ maan poindalano’ montok monginsonong kotinanan nokomoi.
