Hajiji (tanga’) miampai dii Safar (gibang), Soh (kaapat, wanan), Wong (kaapat, gibang) om puru SLRAC katalib ramai kinapatahakan watikah kinoposilihan.
KOTA KINABALU: Koporintaan pogun minonuridong Kounsol Monontuduk Reformasi Undang-Undang Sabah (SLRAC) sabaagi wookon mantad inggisaman lobi kagayo montok popoudong kobontugan undang-undang, monginggirot kopoindalanan karaja’ nogi’ mongunsub reformasi undang-undang id Sabah.
Boyoon Montiri, Datuk Seri Haji Hajiji Haji Noor minoboros, pinonuridongan SLRAC nopo inggisaman oponsol i kituduan popoinwagu om monginsonong kerangka undang-undang id Sabah mooi do lobi kiwaya’ monumboyo’ kogunaan rayat.
“Koporintaan pogun magalap pomusarahan nogi’ atag di osonong mantad SLRAC i pikikiro kosili impohon kumaa reformasi undang-undang i kirati om po’ompus id Sabah,” ka disio.
Ka di Hajiji, inggisaman diti nga’ kopiongoi nogi’ di visio disio montok mokimokito Sabah sabaagi pogun di ‘progresif’, kopotonggoi ngaawi’om kipomusarahan osodu’ id toguang, hinombo koburuon undang-undang kapanau kopiongoi di komogoton sosiol om ikonomi, miampai monimporon tungkusan olumis pogun diti.
Minoboros isio dilo’ katalib pinapatahak watikah kinoposilihan kumaa tongo’ puru SLRAC i binuruan di Ponorikohon dilo’, Tan Sri David Wong Dak Wah, bagas Luguan Hakim Sabah om Sarawak, id iso’ ababayan doid Menara Kinabalu do hiti, di tadau baino’.
Puru kounsol suai nopo nga’ ii Datuk Daniel Tan Jwee Peng, Dr. David Fung Yin Kee, Datuk John Sikayun, Datuk Roger Chin Ken Fong om i Shakinur Ain Karama, naamot di Junie Lim sabaagi Monunurat.
SLRAC nopo nga’ songinan tinan monontuduk mimpoopori om posimbayan i kitonggungan popoindalan pogintongan poinpuli kumaa undang-undang haro mantad id nayatan pogun nogi’ papaatag reformasi kosuul montok mongingkawas katalangon, kopulokison, kaadangon om kosudongan undang-undang.
Kounsol po nogi dilo’ nga’ papatantu’ atag reformasi i potoguangon kakal poingimpau do gatang, tadat kinoubasanan nogi’ koyuon otopot sosio-koubasanan di olumis id Sabah.
Nokotindapou i Monunurat Koporintaan Pogun, Datuk Seri Sr. Safar Untong om Luyar Agayo Pogun, Datuk Brenddon Keith Soh.
