Haji Hajiji Haji Noor
KOTA KINABALU: Koporintaan pgoun tumilombus monginggirot tonggungan kumaa koburuon balajaran aakwas maya’ mogisusuai inggisaman pobuntukon, kaampai kinopoobian bobos akawas gisom noondo diti kiginumu’ RM136 riong montok Sikulasip Koporintaan Pogun Sabah (BKNS) toun diti.
Boyoon Montiri, Datuk Seri Haji Hajiji Noor minoboros, kinoingkawason agayo mantad RM50 riong di toun 2020 kuminaa RM136 riong toun diti kopokito kinotopoton kopoirntaan id kopotontuan kosiwatan balajaran akawas oromut di oinsanan tanak Sabah, amu’ momuntuk ningkakaton sosioikonomi.
“Iti nopo mga’ kopoopuan timpu anaru koporintaan id kopoburuan ‘modal insan’ di osonong om kiginoris tumopong. Amu’ tokou mimang tanak Sabah oiduanan mantad balajaran sasabab no do kohimpogogongan kousinan,” ka disio id Ramai Kinapatahakan Inggisaman Ponguhupan Toluod Mahasiswa Pinsingilaan Akawas Suang Pogun Sabah (SENTOSA) id Lintuhun Canselor Univositi Malaysia Sabah (UMS) do hiti di tadau baino’. Teks boboroson disio binasa’ di Montiri Sains, Tiknologi om Inovasi Pogun, Datuk Dr. Mohd. Arifin Mohd. Arif.
Hajiji minoboros, soginumu’ 4,170 susumikul i kaanu koundaran mantad sakadai BKNS toun diti, kopinongoi di sondikoton Sabah Maju Jaya (SMJ) id kopogorisan siktor balajaran sabaagi posunduran komogoton pogun.
Pro-Canselor UMS dilo’ minoboros, toun diti nopo, koporintaan pogun pinooobi’ RM77.5 riong montok pinopoindalan 13 inggisaman ponguhupan balajaran i kapanahak koundaran kumaa tongo’ sikul, Koisaan Molohing om Mongingia’ (PIBG), susumikul Institut Balajaran Akawas (IPT) nogi’ koisaan susumikul Sabah id suang om labus pogun.
Ka disio, wookon inggisaman agayo kaampai Ponguhupan Tusin Koporojistoran IPT Miampai One-Off (BUDI), Ponguhupan Ihsan Komputer (BAIK), Sekretariat Mahasiswa Sabah Malaysia (SEMESTA) om Ponguhupan Tikit Pontuludan Susumikul Sabah (GRS-SUBFLY).
Ka disio, Yayasan Sabah nga’ pinapapanau nogi’ tonggungan agayo id koburuon balajaran soira’ pinopoobi’ RM67.17 riong di toun nakatalib, i nakapanahak koundaran kumaa 3,234 susumikul.
Ka disio, maya’ Kounsol Ugama’ Islam Sabah (MUIS) nopo, pabalanjaan soginumu’ RM92.4 riong pinatahak id timpu limo otunmaya’ Bohogian Zakat om Fitrah, nokouhup lobi 48,000 susumikul mantad pototongkop pogun.
I Hajiji minoboros, montok papatantu’ kotilombuson sokodung balajaran, Tabung Balajaran Pogun Sabah (TPNS) i pinointutunan di tulan Koonom 2022 nakapanahak koundaran kumaa somok 10,104 mamaramit, nokopohompit pabalanjaan soginumu’ RM15.8 riong gisom noondo.
Minoboros isio, ponguhupan SENTOSA i pinoimpuun di tulan Kotolu katatalib id Institut Balajaran Mongingia’ (IPG) Kampus Gaya, nokopohompit kinopoobian RM6 riong om minomorikot kikiro 20,000 susumikul mamasok Sabah i minsingilo id IPT suang pogun.
“Ponguhupan diti kituduan monginggaan tonggungan kousinan susumikul, kosuul no montok kogugunoon toi muli’ kumaa kampung nantadon. Ilo’ po nogi’ nga’ kopokito tinopot koporintaan id kopotontuan aiso’ susumikul i oidunana mantad balajaran,” ka disio.
Id ababayan dilo’, i Dr. Mohd. Arifin minongobi’ di Hajiji pinapatahak ponguhupan SENTOSA miampai tunui one-off soginumu’ RM300 songulun kuminaa di lobi 600 susumikul, kopohompit 316 susumikul UMS om 323 susumikul Kolej MAHSA Sabah i amu’ po nakaramit ponguhupan dilo’ di pogulu diti.
“Kalansanan ku tongo’ susumikul momoguno poingundar koinsanai ponguhupan i pinosodia’ om tumilombus minggisom mamagampot kalantaion id kaganaan sompoopori montok timpu dumontol pogun om pomogunon,” ka disio.
