Dr. Joachim (tanga’), Suman (kaapat, gibang) om i Flovia (kaapat, wanan) guminambar pongingitanan miampai toinsanan i nokotindapou id pinomupusan Mitingan Agayo Toun-toun ko-40, PBS Bohogian Tulid.
KENINGAU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minokianu oinsanan puru parti, kosuul no sukod wagu om komulakan, mooi do tumilomus minsomok mogigiyon miampai mindahu’ kumaa kokompungan om popogoris do komulakan nokoiyonon.
Dr. Joachim po nogi’ Kumoduo Boyoon Montiri II, minongunsub nogi’ koinsanai pakakaraja’ PBS do miiso’ ginawo om papatantu’ kalantaion Gabungan Rakyat Sabah (GRS) id Pomilian Agayo Pogun (PRN) i abantalan.
“Kalansanan ku oinsanan puru PBS id Tulid do kapanahak sokodung poinponu’ miampai nombo-nombo parti komponen id GRS.
“Piuhupan id GRS nopo nga’ i bobos osonong om koponongkuyanan. Konvensyen i pinaharo nokopokito piupakatan i nuru’ tilombuson om podolinon soira’ orikot timpu do miamung miampai pohimagon,” ka disio onotk pinopoimagon pomupusan Mitingan Tohuri Toun-toun PBS Bohogian Tulid id Lintuhun Kampung Kapayan Baru, do hiti, di tadau baino’.
Dr. Joachim (tanga’) tinanud di Flovia (wanan) om i Suman ontok suminuang id Lintuhun Kampung Kapyaan Baru.
Dr. Joachim pinoposotol, PBS toririmo tumopot monokodung kootuson lansanon akawas GRS, kaampai calun i maan pointangao’ id koiyonon Tulid.
“Otumbayaan oku tindikohon Tulid kotimporon id tonggom GRS. I oponsol, kumaraja’ kou do agaras. PBS ‘are here to stay’. Gigisom po do kopokionuan tokou amu’ otumboyo’, potilombuson tokou inggisaman,” ka disio pinoposotol.
Minonongunsikou nogi’ iiso kumaa di Luguan Bohogian PBS Tulid, Datuk Suman Yasambun mantad kinapagalapan om kinalantaion pinapaanjur mitingan dilo’.
Dr. Joachim (tanga’) miampai dilo suai pinopoindalan ababayan momutul kek.
Minanangkabayahan nogi’ isio kumaa Ponorikohon Popoindalan Ababayan, Andrey Asang om Ponorikohonon Mitingan, Datuk Peter Jino Allion om koinsanai puruan komitikuasa’ popoindalan i mininggisom pinapalantoi ababayan dilo’.
“Bayahan kumaa nogi’ koinsanai AJK raan i nakalantoi pinapaharo mitingan sompoopori nogi’ pinapaatod mobi’ kuminaa mitingan bohogian diti,” ka disio.
Nokotindapou nogi’ i Timbang Presiden PBS po nogi’ Luguan Komulakan, Datuk Dr. Christoper Mandut; Puru Lintuhun Undangan Pogun (ADUN) Tulid po nogi’ Monguhup Montiri Koburuon Mogigiyon om Kasasanangan Rayat, Datuk Flovia Ng; tongo’ Luguan Bohogian om pipiro po Puru Kounsol Akawas PBS di suai.
Nokotindapou po nogi’i Luguan Bohogian Parti Gagasan Rakyat sabah (Gagasan Rakyat), Jehan Osman.
