Dr. Joachim (tanga’), Julita om oinsanan nokotindapou id Mitingan Toun-toun PBS dilo’ guminambar pongingitanan oinsanan.
KUDAT: Ponowoli Presiden Parti Bersatu Sabah (PBS), Datuk Seri Dr. Joachimg Gunsalam minongunsub oinsanan parti id Gabungan Rakyat Sabah (GRS) do tumilombus monginggirot piuhupan montok monoguang Pomilian Agayo Pogun (PRN).
Minoboros ontok pinopoimagon Mitingan Agayo Toun-toun PBS N5 Matunggong id Lintuhun Poingukab Kakadayan Matunggong di konihab, pinosotol nogi’ disio do piuhupan ogirot pialatan PBS om Parti Solidariti Tanah Airku (STARSABAH) okon ko’ monginraag nindikohon GRS, nga’ monginggirot piomungan dilo’ montok kalantaion oinsanan.
Dr. Joachim (tanga’), Julita om puru PBS di suai minomutul kek.
“Montok monoguang PRN, nuru’ tokou do misompuru id sahau GRS,” ka disio.
Ka di Dr. Joachim, koporintaan GRS nopo koporintaan opusou kumaa kobolingkahangan rayat miampai mogisusuai ponguhupan pinatahak om nogi’ kumaa rayat Matunggong miagal Ababayan Walai Mesra SMJ, Sentuhan Kasih Rakyat (SYUKUR) om Skim Insurans Rakyat Sabah, Inggisaman Balajaran, projik ponuridongan om koponginsonongan ralan kampung nogi’ pomutanaman pinoindalan.
Isio po nogi’ Kumoduo Boyoon Montiri II om Montiri Koporintaan Koiyonon om Pomuwalaian minokianu nogi’ do puru PBS mooi do misompuru om mongilag pogiuriasan montok papatantu’ kalantaion calun GRS id Matunggong.
Dr. Joachim (tanga’) minamaramit ‘skrol’ Ikrar PBS mantad di Timbang II Tinimungan Komulaakn PBS N5 Matunggong, Robert Kasitum om sinasi’ dio’ Julita (koduo, gibang) dii Epson (gibang).
Id boboroson disio, Dr. Joachim minanangkabayahan kumaa di Luguan Bohogian PBS Matunggong, Datuk Julita Majungki om Ponorikohon Manganganjur Ramai i po nogi’ Monunurat Bohogian Epson Kawahui, mantad kinalantaion pinapaanjur mitingan dilo’ i notindapou lobi 1,000 puru om mio’ontong mantad parti ngaawi’ komponen GRS.
Dr. Joachim (tanga’) miampai di Julita (id tohuri) tuminabi’ om minonuau dilo puru PBS ontok nokorikot id Lintuhun Poingukab Kakadayan Matunggong.
Ka disio, PBS mongobi’ do GRS id Matunggong om pinopolombus isio sokodung ouli’ kumaa di Julita sabaagi calon GRS montok tindikohon DUN Matunggong, om minokianu oinsanan puru do papatantu’ kalantaion disio.
“Kalansanan ku nogi’ kosompuruan PBS id Matunggong kotilombus koinggumu’,” ka disio.
Nokotindapou nogi’ id mitingan dilo’ i Timbang Presiden po nogi’ Luguan Tinimungan Exco Komulakan, Dr. Christoper Mandut; nuludan Puru Kounsol Akawas, Exco Koonduan, Exco Komulakan, tongo’ Luguan Bohogian om mobi’ mantad parti ngaawi’ id GRS om lansanon ngaawi nokoiyonon.
