Hajiji (tanga’) minamaramit tandamato mantad di Dr. Zhu (koduo, gibang).
KOTA KINABALU: Boyoon Montiri (KM), Datuk Seri Haji Hajiji Haji Noor otumbayaan piromutan osonong id pialatan Sabah om Republik Rakyat China kotilombus oinggirotan maya’ piromutan diplomatik nogi’ mogisusuai inggisaman koburuon goduo.
Boyoon Montiri minoboros dilo’ ontok minamaramit kotombuluyan apantang Konsul Jeneral Republik Rakyat China id Kota Kinabalu di wagu, Dr. Zhu Xinglong id Menara Kinabalu do hiti, di tadau baino’.
Id pinirubaan dilo’, i Hajiji minanangkabayahan mantad kinoposilihan di Dr. Zhu om minonuau disio kumaraja’ id Sabah.
“Otumbayaan oku kinorikotan di Dr. Zhu kapanahak kosimbuaton wagu id piuhupan misulak i alaid no nokopigokos pialatan Sabah om China, lolobi id siktor kopoopuan, pidagangan, ponombuluyan, balajaran om susuai po,” ka disio.
Hajiji pinoposotol nogi’ do tonggungan koporintaan pogun id koposodiaan koyuon kopoopuan di osimbayan om osuau mangangapu’ montok mongimbayat lobi kogumu’ komponi China do papaapu’ id Sabah, kosuul no id koiyonon pomorunan kosudong.
Kinotombuluyan kumoinsan nopo dilo’ nga’ kinopointutunan di Dr. Zhu pointonod sinili sabaagi Konsul Jeneral Republik Rakyat China id Kota Kinabalu, minongolon di mongingigit pogulu, Dr. Huang Shifang.
