KOTA KINABALU: Suruhanjaya Pantalaban Susuap Malaysia (SPRM) Sabah minanahan duo tulun, kopohompit songulun pakakaraja’ koporintaan om songulun nokopinsin songinan koupisan koporintaan id pogun diti tu’ kotumbayaan minokianu om minamaramit susuap kiginumu’ kikiro RM66,000 sabaagi pongudsor montok monompuan upalai tana’ om pinopowonsoi pongintoban lot tana’.
Tumanud intodonon kointalangan, goduduo kusai kiumur kikiro 50 gisom 60-an dilo’ tinahan id pialatan jam ko 10 gisom ko 11 kosuabon konihab ontok tuminingan minanahak kopointalangan id upis SPRM Sabah.
“Goduduo notondosan kotumbayaan pinopowonsoi koulalaho’ dilo’ di pikikiro toun 2016 sundung goduduo diolo’ aiso’ kosudongan montok monompuan upalai om nogi’ aiso’ lot tana’ montok kopongintoban.
“Pinonoriukan osopung nga’ nokoilo goduduo notondosan kotumbayaan minamaramit susuap kiginumu’ kikiro RM54,000 om RM12,000 tikid songulun mantad pipiro tulun montok tuduan monompuan upalai tana’ om popowonsoi pongintoban (bancian) lot tana’ id siriba’ skim tana’ pasanganu koporintaan pogun,” ka disio.
Naamot dilo’, i Potunud SPRM Sabah, Datuk S. Karunithy soira’ rinomut pinopoimagon kinopomogombitan dilo’ om minoboros, kes sinoriuk tumanud Seksyen 17(a) Akta SPRM 2009.
Ka disio kawagu, goduduo notondosan dawahon id timpu oruhai.
