Hajiji guminambar miampai lansanon GRS om Gagasan Rakyat, tongo’ mongongobi’ om puru parti i nokotindapou id Ramai Kinopoimaganan Pitimungan Toun-toun Gagasan Rakyat Bohogian Sulaman Toun 2025.
TUARAN: Boyoon Montiri, Datuk Seri Haji Hajiji Haji Noor minoboros, amu’ po isio’ nakapatantu’ nunu-nunu tadau montok kopongunggaran Lintuhun Undangan Pogun (DUN) Sabah nosusuhut ‘spekulasi’ (pagkakaa) karait haal dilo’ i pikikiro do koompokon tulan Koturu’ toi kolimpuunon tulan Kowalu’ obontol.
Poingkuro po minanahak isio ponginsomokan do momonsoi kapahabaran karait haal dilo’ katalib Pitimungan Agayo Parti Gagasan Rakyat Sabah (Gagasan Rakyat) do koompokon wulan Koturu’ orikot.
“Amu’ po, miting tokou po gulu pitimungan agayo do koompokon wulan Koturu’,” ka di Ponorikohon Gabungan Rakyat Sabah (GRS) dilo’ soira’ rinubaan magaganu habar katalib pinopoimagon Pitimungan Toun-toun Parti Gagasan Rakyat Bohogian Sulaman id Lintuhun Seri Sulaman do hiti di tadau baino’.
Hajiji po nogi’ Presiden Gagasan Rakyat om Luguan Bohogian Gagasan Rakyat Sulaman pinokianu mongomi karait kopikikiraan DUN unggaron do koompokon wulan Koturu’ montok manahak pawaya’an kumaa Pomilian Agayo Pogun Ko-17 (PRN17).
Daamot dilo’, Hajiji pinoposotol piomungan parti momorinta’ buruanon disio dilo’ poinsodia’ monoguang disaisai nopo id PRN17 obontol.
Ka disio, ilo’ nopo nga’ ningkakaton GRS, nga’ nunu-nunu kootusan karait monuridong piuhupan pulitik montok monoguang pomilian agayo mositi’ potontuon di Puru Kounsol Akawas (AMT) piomungan parti nokoiyonon dilo’.
“GRS poinsodia’ montok monoguang disaisai nopo id pomilian agayo obontol.
“Ilo’ o ningkakaton tokou nga’ nunu nopo koyuon piuhupan mositi’ potontuon do Puru Kounsol Akawas GRS,” ka disio.
Pinointalang nogi’ disio sokodung kumaa pomusarahan Kumoduo Monunurat Agayo GRS, Datuk Armizan Mohd Ali i kaakun GRS mituka’ do Barisan Nasional (BN) id PRN17.
“Sokodungon ku pomusarahan disio, nga’ ingkuro pia amu’ tokou po nokowonsoi kootusan di pohimagon. Iti okon ko’ mantad doho’, mantad parti BN i pinopointalang do amu’ yolo’ orohian.
“Kada’ tokou sansagai tulun nung amu’ orohian,” ka disio.
Di konihab, Armizan minoboros, isio miampai poinpoopori kaakun di Luguan UMNO Sabah, Datuk Seri Bung Moktar Radin montok popologos GRS om BN mituka’ id pomilian agayo dilo’ do obontol.
Daamot dilo’, Hajiji minoboros, Pitimungan Agayo Toun-toun Gagasan Rakyat diti baino’ oponsol tu’ pinaharo ilo’ dumontol PRN17 i pohoroon do amu’ no alaid.
“Mantad dilo’, kapasarahan om pason ku kumaa puru ngaawi’ Gagasan Rakyat om GRS mooi do misompuru ginawo diolo’. Poroniton nuludan, inggarasan pakakaraja’ parti montok dati’ monoguang pomilian agayo i amu’ no songkuro kalaid,” ka disio.
Nokopogulu, id boboroson kinopoimaganan disio, pinoposorou i Hajiji lansanon om puru Gagasan Rakyat om GRS mooi do maganu pontudukan koyuon pulitik maso-maso om mongilag tudut i patayadon pembangkang maya’ media sosial.
“Mositi’ tokou komilo mangadang nunu totondos om pongudutan ngoi’ nunu i winonsoi do koporintaan.
“Kada’ do aampawong di totondos om kopongudutan i owiton do pembangkang.
“Pologoson pembangkang mimpomonsoi totondos, nga’ yati’ puru Gagasan Rakyat mositi’ mingkakat miampai tambalut tokou id GRS Plus, kosuul no id Sulaman diti,” ka disio.
Pinointalang nogi’ disio o nindikohon GRS id PRN17 obontol, kosuul no kopohompit tambalut ponokiuhup montok monoguang pomilian agayo dilo’.
“Ogumu’ monguhot doho’ poingkuro no koyuon, isai tambalut tokou, hinombo tokou tumanding.
“Sundung aiso’ po kootusan pohimagon tu’ monongkiboros oku po miampai komponen GRS, nga’ yati’ do noondo lobi kosimbayan miagal id koporintaan do noondo ilo’ nopo nga’ GRS-PH Plus.
“Iti korohian rayat id siriba’ do noondo, rayat tokou manu diti do noondo. Ogumu’ parti suai i agayo boros, agayo kabang id labus, nga’ owiton ku iti id GRS. Amu’ oku momonsoi katatapan sosongulun, iti prinsip ku. Pologoson ilo’ do wonsoiyon AMT GRS hinombo sondikoton tokou id pomilian agayo obontol,” ka disio.
Karait tindikohon DUN Sulaman i poingigit disio pointonod 1990, otumbayaan isio tindikohon dilo’ aanu monilombus momusus id siriba’ GRS doid PRN17.
Mokianu nogi’ isio tolu tindikohon suai id Parlimen Tuaran, ilo’ nopo nga’ Pantai Dalit, Tamparuli om Kiulu nga’ kotilombus opusus id siriba’ GRS.
