Hajiji guminambar miampai di Pandikar Amin, lansanon parti komponen GRS om puru ngaawi’ USNO i nokotindapou Kongres Agayo USNO Longkod 2025.
KOTA BELUD: Boyoon Montiri, Datuk Seri Haji Hajiji Haji Noor pinoposotol do parti nokoiyonon mositi’ kiharo kokuasa’an id pulitik Sabah om posuulon id koponuridongan pisokodungan montok monoguang Pomilian Agayo Pogun Ko-17 (PRN17).
Minoboros isio, koporintaan buruanon Gabungan Rakyat Sabah (GRS) i tinuridong do parti nokoiyonon noondo diti nuru’ tilombuson om ilo’ pogi’ do pomilian agayo diti baino’ oponsol kopio kumaa piomungan dilo’.
“Mokianu tokou monilombus koporintaan diti om ilo’ pogi’ montok doho’ pomilian agayo diti baino’ oponsol kopio, kada’ tokou kasala’ momili’. Parti nokoiyonon mositi’ ‘dominan’ id pulitik Sabah, mositi’ posuulon.
“Haal piuhupan dilo’ ‘bab’ suai, nga’ GRS sabaagi parti nokoiyonon, oponsol kopio do pususon tokou, kopiongoi di kopurimanan rayat id siriba’ i mokianu parti nokoiyonon sabaagi momuruan agayo koporintaan.
“Sabaagi Ponorikohon GRS, potontuon ku o haal diti,” ka disio ontok minoboros pinopoimagon Kongres Agayo Kotinanan Kabansaan Sabah Bersatu (USNO) Longkod 2025 id Lintuhun Poingukab Seri Dungkuan Kampung Rampayan Laut, do hiti di tadau baino’.
Hajiji minoboros, amu’ isio asanang montok papatahak kopotutan om poburuon GRS kumaa diolo’ i mumbal popowonsoi toisoiso’ i amu’ osonong kumaa piomungan dilo’.
Kohondot dilo’, pinopointalang isio kalansanan mooi do oinsanan lansanon om puru parti komponen GRS, kaamapi USNO do mindahu’ (turun padang) montok popoindalan kumaa rayat di poburuon do GRS om poposotol do falsafah “Walai Tokou, Yati’ Tumamong” om “Sabah First”.
“Iti sondikoton poburuon tokou id GRS, nung moboros tokou do ‘Walai tokou, Yati’ Manamong’ orotian no, amu’ nuru’ dati’ do sorisidon toroisoiso’, asanang nopo.
“Walai yati’ manamong, kada’ piodu, nung miodu tulun suai i oundaran om koimamang yati’. Mantad dilo’, kada’ piodu, i oponsol kalantoi tokou id pomilian agayo montok monilombus poburuon diti, monguhup rayat om popotunda’ pogun tokou,” ka disio.
Naamot dilo’, Hajiji pinoposotol do USNO om parti komponen suai id GRS kiharo tonggungan di miagal koponsol id piomungan nokomoi.
“Mantad no dilo’ do kalansanan ku USNO om oinsanan kopomuruanan nogi’ mononokodung mositi’ popogi’iso’ ginoris papatantu’ GRS kalantoi id pomilian agayo orikot.
“Mantad dilo’ kinogompitan USNO id GRS oponsol kopio. Okon nopo ko’ USNO, nga’ parti komponen suai id GRS, oinsanan kiharo tonggungan di oponsol no kopio montok papatantu’ ginoris tokou lolobi no monoguang pomilian agayo i amu’ no alaid diti.
“USNO mositi’ popogi’iso’ ginoris diolo’ miampai GRS montok dati’ kaanu kawagu mandat rayat. Soira’ tinuridong tokou GRS, nalap tokou parti komponen i haro noondo diti montok umamapi dati’ minggisom momusus kopotutan Sabah.
“Angkab tokou otulid, osonong sabab sabaagi tulun Sabah, mositi’ tokou momusus kopotutan tokou sabaagi tulun Sabah toi Sabahan, nuru’ tokou do miiso’ ginawo,” ka disio.
Minoboros isio, nung iso’ no parti i minggisom, ilo’ amu’ doti’ kalantoi mongigit karaja’ agayo dilo’ om mantad no dilo’, GRS momgouno oinsanan tambalut popoindalan tonggungan di miagal amu’ momuntuk nung parti dilo’ agayo toi okoro’.
“Manu tokou popoburu’ konosipan rayat tokou i kakal noiduanan om momoguno kopongobianan, monimbuat tokou rontob koposion diolo’ i kakal ogumu’ osusa’.
“Manu tokou popoinggumu’ koburuon infrastruktur om ikonomi id Sabah tu’ ilo’ pogi’ montok doho’ tonggungan GRS i noondo diti nosili koporintaan nuru’ tokou onuan mandat insan po do momorinta’ Sabah katalbi pomilian agayo orikot,” ka disio.
Hajiji pinopointalang nogi’ kopongunsikohan mantad tonggungan USNO kumaa GRS miampai slogan dau ‘USNO om GRS au kopitongkiad’ miagal rinoitan di Presiden dilo’, Tan Sri Pandikar Amin Mulia.
