Dr. Joachim (tanga’) guminambar pongingitanan miampai Puru Puruankuasa Induk Pamaramaian Kouliton Toun Pinotomod ko-74 TYT Sabah.
KOTA KINABALU: Kiginumu’ turu’ ababayan agayo i nulud montok pamaramai po Kapamaramaian Kinouliton Toun Kinosusuon Pinotomod ko-74 Molohingon Agayo Pogun (TYT) Pogun Sabah i kapanau do tulan tiso’ (tulan Ko’onom).
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, posodiaan oulud winonsoi pointonod podi kolimpuunon tulan Koduo di Puruankuasa’ Induk om Puruankuasa’ Popoindalan montok papatantu’ tikid ababayan kapanau do oturundus om poinponu’ kaadaton.
Minoboros isio, pamaramaian kinouliton toun pinotomod diti nopo nga’ ababayan tikid toun pogun i okon nopo ko’ kituduan manahak pamantangan kumaa TYT nga nogi, kopokito koisaan nogi’ sunduan mongupus pogun id nayatan rayat.
“Sabaagi Ponorikohon Puruankuasa Induk, oondos oku kopio di tonggungan oinsanan bohogian i nokohompit papalantoi pamaramaian diti. Mimang tokou ababayan diti okon nopo ko’ ponokotanda’, nga’ otootopot opurimanan do rayat,” ka disio id kapahabaran media pinotomod doid Kompleks Bersepadu Komontirian Piromutan, do hiti di tadau baino’.
Ka disio, wookon ababayan oponsol i tingkananon nopo nga’ Istiadan Pinguhuyudan om Pogionud-onudan i kapanau doid Padang Merdeka, Kota Kinabalu.
Dr. Joachim ontok tinuubungan media.
Ababayan limunduk dilo’kopokito kotonudan lobi 80 kontinjen kapaampai do koupisan koporintaan, kotinanan mimpoopori, kotinanan okon koporintaan (NGO), kotinanan pinsingilaan akawas om susumikul sikul.
“Kotonudan di poinpuli diti kopokito sunduan pisompuruan om ‘patriotisme’ rayat Sabah kkumaa kopomuruanan pogun,” ka disio.
Suai dilo’, raptai poinponu’maan poindalano’ do pipiro tadau pogulu orikot ababayan kopio montok papatantu’ koturunduson pinghuyudan, miampai do isio sondiri tumingan mooi intong om mangadang rontob kosodia’on oinsanan bohogian di poinghompit.
“Tumindapou oku ontok raptai poinponu’ sabaagi tonggungan kumaa kalantaion pamaramaian diti. Mimang tokou osorisid koindadalano’,” ka disio.
Kaampai nogi’ id turu’ ababayan agayo dilo’ o ponongjuran Kapahabaran Media Pinotomod, i babaino’ diti nosili ababayan pinotomod pamaramaian montok papasaga’ piromutan mitilombus id pialatan Puruankuasa’ Popoindalan om bohogian media.
Minoboros isio, kapahabaran media dilo’ oponsol montok papatantu’ kointalangan di otopot katahak kumaa rayat, suai ko’ mongunsikou tonggungan media id kapalantaion ababayan koporintaan.
Ababayan kaapat nopo Ramai Sopisuau om Moginakan Pogun i kopotimung tongo’ lansanon pogun, mobi’ diplomatik, luguan koupisan om tongo’ mongongobi’ mogigiyon id koyuon di poinponu’ piuludan om pamantangan.
Ramai dilo’ kosili koiyonon mamaramai kinouhupan om om toluod mogisuai bohogian id kinoburuon nogi’ kaadangon pogun Sabah.
Ababayan kolimo nopo kapaampai do kougamaan ilo’ nopo nga’ Ababayan Kerohanian om Doa Selamat i pohoroon sabaagi tanda’ pongunsikohan nogi’ momodu’a komoomogoton di TYT, i Toh Puan om sampaganakan.
Dr. Joachim (kaapat, gibang) guminambar miampai tombului i nokotindapou om popinwara’ rodiu Sabah Vfm katalib pituubungan id konti Sabah Vfm.
Dr. Joachim minoboros, koyuon kerohanian oponsol montok posuni koyuyuon kouludon om kopurimanan id nayatan mogigiyon mogisusuai tinaru om ugama’ id pogun diti.
Mintonod kolimpuunon tulan Koonom, bohogian kikuasa id pototongkop pogun nga’ popoindalan nogi’ do ababayan koonom ilo’ nopo nga’ kapamasangan papan kopoilaan pason kinouliton toun id kinoiyonon sompoopori sabaagi tanda’ pongunsikohan om sokodung kumaa kopomuruanan di TYT.
“Inggisaman diti okon nopo ko’ kapanahak koyuon pamaramaian id nayatan watas, nga nogi’ kopokito tonggungan PBT kumaa pisompuruan pogun,” ka disio.
Ababayan koturu’ nopo nga’ kopohompit ponuangan kapaampai mogigiyon om koubasanan, wookon dilo’ pokiikitanan kesenian, ababayan momolihis rayat nogi’ ababayan ‘interaktif’ i kopohompit mogisusuai nayatan mogigiyon.
“Ababayan diti okon nopo ko’ monginggirot ginirot tinan rayat Sabah, nga nogi’ koposuni sunduan doun tokou om kaandasan kumaa tungkusan pogun,” ka disio kawagu.
Kohondot dilo’, alapon disio oinsanan rayat Sabah do rumikot id Padang Merdeka do tulan Koonom diti mooi intong sondiri’ di ababayan i kotimpuun osopung jaam ko 6 minsusuab.
“Pokionuon ku oinsanan rayat amu’ momuntuk nantadon do umampai mamaramai pamaramaian diti sabaagi ponokotanda’ pamantangan om koupusan kumaa kopomuruanan akawas pogun tokou,” ka disio.
Nangatan nogi’ disio rayat do toririmo momodu’a kolidason om kososonongan di TYT, Toh Puan om paganakan mooi toririmo oumoligan om awanadan.
“Kopomuruanan di TYT i kitonggungan, opusou om poinpuli id kapanamangan kotundunan rayat apatut silihon turianan do oinsanan,” ka disio.
Nokotindapou nogi’, Monunurat Atatap Komontirian, Datuk Dr. Jamili Nais; Monunurat Olisok kumaa TYT, Izharudin Jalaludin; Potunud Kosolimbahan Sabah, Mohd. Yusni Mohamed Ali; Potunud Kopointalangan Sabah, Jainisah Mohd. Noor om upisor Komontirian, om puru Komontirian Piromutan.
