Hajiji (kaapat, wanan) guminambar miampai di Datuk Joniston Bangkuai (kotolu, wanan) om tinonudan katalib kotombuluyan apantang.
KOTA KINABALU: ASEAN Travel Exchange (ATEX) 2025 i nokoulud kapanau do hiti ontok ko 19tw Koonom kopotimung di popoburu’ pomorunan ponombuluyan songkoiyonon montok monginggirot piuhupan id pomorunan ponombuluyan ASEAN.
Boyoon Montiri, Datuk Seri Haji Hajiji Haji Noor di tadau baino’ minamaramit kopointalangan karait do ATEX 2025 mantad di tinonudan popoburu’pomorunan ponombuluyan kinointutunan akawas id Menara Kinabalu.
Presiden Pisompuruan Koisaan Ponombuluyan ASEAN (FATA), Datuk Tan Kok Liang minoboros, ATEX 2025 kosili ababayan ponombuluyan B2B sompomogunan kumoiso’i pinaanjur om pikikiro koimbayat kotonudan 200 momomoli sompomogunan nogi’ 100 papadagang songkoiyonon montok tuduan pidagangan, pibarasan om piuhupan id siktor ponombuluyan.
Sinokodung do Komontirian Ponombuluyan, Koubasanan om Sandad Posorili’ pogun nogi’ kotinanan ponombuluyan oponsol, ATEX 2025 pikikiro kosili posunduran montok popo’iliu Sabah id nuludan sogulu pidagangan ponombuluyan songkoiyonon om sompomogunan.
Tinonudan dilo’ kapaampai di Presiden Koisaan Ponombuluyan ASEAN (Aseanta), Eddy Krismeidi; i Tan; Presiden Koisaan Ejen-Ejen Ponombuluyan om Pihahambaan Malaysia (Matta), Nigel Wong; nogi’ Potunud Dasar Global om Piromutan Koporintaan AirAsia, Zamani Rafique.
Nakaampai nogi’ id tinonudan dilo’ Monguhup Montiri Ponombuluyan, Koubasanan om Sandad Posorili’ i po nogi’ Ponorikohon Kotinanan Ponombuluyan Sabah, Datuk Joniston Bangkuai.
