Dr. Joachim Gunsalam
KOTA KINABALU: Koporintaan Pogun kiharo palan montok monuridong lobi kogumu’ pomuwalaian kos osiriba’ i ogoosan sumanganu montok B40 id pototongkod Sabah.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, id Palan Malaysia Ko-12 (RMK-12), koporintaan pogun maya’ kotinanan popoindalan dau, Kotinanan Koburuon Pomuwalaian om Kakadayan (LPPB) mamaso popoindalan ponuridongan pomuwalaian kos osiriba’ soginumu’ 225 unit id limo kinoiyonon kosudong ilo’ nopo 50 unit id Beluran om 50 unit id Pitas, maya’ sakadai poinponu’ do kopoirntaan pogun.
“Walai maan padagango’ kumaa tinimungan B40 i kinindopuan osiriba miampai gatang RM47,000 iso’ unit,” ka disio ontok minonimbar ponguhotan Datuk Suhaimi Nasir (ADUN Sinili) id Pitimungan Lintuhun Undangan Pogun (DUN) Sabah di tadau baino’.
Dr. Joachim minoboros, koporintaan pogun maya’ LPPB nga’ minamalan nogi’ montok monuridong lobi po kogumu’ walai kos osiriba’ montok tinimungan B40 diti id RMK13 id siriba’ kousinan koporintaan pogun do obontol.
Ka disio, ilo’ do noondo id nayatan kopogintongan nogi’ kopolulusan do bohogian Unit Pamalanan Ikonomi Pogun (UPEN) Sabah.
